اسلام آباد : چئیرمین تحریک انصاف عمران خان آج سندھ کا دورہ کریں گے، جہاں وہ پی ٹی آئی کیمپ میں امدادی سرگرمیوں کا جائزہ لیں گے۔
تفصیلات کے مطابق چئیرمین تحریک انصاف عمران خان آج سندھ اور بلوچستان کے سیلاب سے متاثرہ علاقوں کا دورہ کریں گے۔
عمران خان آج سکھر میں سیلاب متاثرین کیلئے لگائے گئے پی ٹی آئی کیمپ میں امدادی سرگرمیوں کا جائزہ لیں گے۔
چیئرمین تحریک انصاف سیلاب متاثرین کے ساتھ دوپہر کا کھانا کھائیں گے اور سکھر کے بعد جعفرآباد جائیں گے۔
پی ٹی آئی رہنماؤں ارسلان تاج اورعالمگیر خان نے عمران خان کے دورہ سندھ کے حوالے سے پریس کانفرنس میں بتایا کہ عمران خان آج سکھر میں سیلاب زدگان کیلئےریلیف کیمپ کاافتتاح کریں گے۔
ارسلان تاج کا کہنا تھا کہ پنجاب حکومت کی جانب سے بھی امدادی ٹرک آج سکھر پہنچیں گے، سندھ حکومت کی جانب سے سیلاب متاثرین کی کوئی مدد نہیں کی جارہی۔
پی ٹی آئی رہنما نے کہا سندھ حکومت کے ریلیف کیمپس میں سہولتوں کا فقدان ہے ، سندھ بھر میں سیلاب متاثرین صوبائی وزراکےخلاف احتجاج کررہے ہیں۔
