لندن: برطانوی ادارے نے 2019 کی پسندیدہ شخصیات کی فہرست جاری کردی جس کے مطابق وزیراعظم پاکستان اور پی ٹی آئی کے سربراہ عمران خان کا نام تین درجے ترقی کے بعد فہرست میں شامل ہے۔
تفصیلات کے مطابق برطانوی ویب سائٹ یوگو کی جانب سے 2019 کی پسندیدہ شخصیات کی فہرست جاری کی گئی جس میں وزیر اعظم عمران خان سمیت نوبل انعام یافتہ پاکستانی طالبہ ملالہ یوسفزئی کا نام بھی شامل ہے۔
فہرست کے مطابق ملالہ یوسف زئی ایک درجہ ترقی کے بعد 6 نمبر پر پہنچ گئیں، بھارتی وزیر اعظم بھی اُن ہی کے ہم پلہ ہیں۔ نوبل انعام یافتہ طالبہ کو 3.9 پوائنٹس دیے گئے۔ْ
گزشتہ برس شائع ہونے والی فہرست میں وزیراعظم عمران خان کا نام 20ویں نمبر پر تھا البتہ اب اُن کی تین درجہ ترقی ہوئی اور وہ 1.9 پوائنٹس کے ساتھ 17ویں نمبر پر آگئے۔
مشعل اوباما دنیا میں سب سے زیادہ پسند کیے جانے والی خاتون اسی طرح بل گیٹس مردوں میں پہلے نمبر پر رہے۔ گزشتہ برس انجلینا جولی کا پہلا نمبر تھا البتہ رواں سال اُن کی دو درجہ تنزلی ہوئی۔
بارک اوباما دوسرے جبکہ جیکی چن تیسرے، شی جنگ پنگ چوتھے، علی بابا کمپنی کے سربراہ جیک ماہ پانچویں، نریندر مودی چھٹے، کرسٹیانو رونالڈو ساتویں، دلائی لاما آٹھویں، لیونل میسی نویں، روسی صدر دسویں نمبر پر رہے۔
حیران کن طور پر رواں برس کی فہرست میں شاہ رخ خان کا نام شامل ہوا اور انہوں نے سلمان خان کو بھی پیچھے چھوڑ دیا، کنگ خان 2.2 پوائنٹس کے ساتھ سولہویں اور سلمان خان 18ویں نمبر پر رہے، اسی طرح رجب طیب اردوغان کی پوزیشن مستحکم رہی اور وہ 19ویں نمبر پر رہے۔
سب سے زیادہ پسند کی جانے والی خواتین میں مشعل اوباما پہلے، اوپرا ونفری دوسرے، انجلینا جولی تیسرے، ملکہ برطانیہ چوتھے،ایما واٹسن پانچویں، ملالہ یوسفزئی چھٹے، پنگ لیوان ساتویں، ہیلری کلنٹن آٹھویں، ٹو یویو نویں اور ٹیلر سوفٹ دسویں نمبر پر رہیں۔
سال 2018 کی پسندیدہ شخصیات کی فہرست میں سابق امریکی صدر بارک اوباما کی اہلیہ مشعل اوباما دوسرے نمبر پرتھیں جبکہ ڈونلڈ ٹرمپ 17 ویں نمبر پر تھے۔
خیال رہے برطانوی ویب سائٹ نے پسندیدہ شخصیات سے متعلق فہرست میں مجموعی طور پر 20 خواتین اور 20 مرد حضرات شامل کیا ہے اور اس کے نتائج کے لیے 35 ممالک کے 37 ہزار افراد سے آن لائن انٹرویو کیا گیا۔
