اسلام آباد : چیئرمین تحریک انصاف عمران خان کی ہدایت پر پی ٹی آئی کی جانب سے موٹر وے کھولنے کا اعلان کردیا گیا اور کارکنان گھروں کو روانہ ہوگئے۔
تفصیلات کے مطابق تحریک انصاف کے چیئرمین عمران خان نے سماجی رابطے کی ویب سائٹ ٹوئٹر پر اپنے پیغام میں کارکنوں کوملک بھرمیں تمام رکاوٹیں ہٹا کر سڑکیں کھولنے کی ہدایت کرتے ہوئے کہا کہ ہمارا حقیقی آزادی مارچ ایک بار پھر سے شروع ہوگیا ہے، کارکنان فوری طور پر سڑکوں کی بندش ختم کردیں۔
As our Long March for Haqeeqi Azadi has resumed once again, I am calling on all our workers to end their road blockades with immediate effect.
— Imran Khan (@ImranKhanPTI) November 10, 2022
جس کے بعد پی ٹی آئی کی جانب سے موٹر وے کھولنے کا اعلان کردیا گیا اور عمران خان کی اگلی ہدایت تک کارکنان گھروں کو روانہ ہوگئے۔
خیال رہے چیئرمین پی ٹی آئی عمران خان پر قاتلانہ حملے کے خلاف عوام کا احتجاج جاری تھا ، اسلام آباد میں رہنما پی ٹی آئی زلفی بخاری اور ساتھی کارکنوں نے ایم ون موٹروے انٹرچینج بند کر دیا تھا۔
ایم ون موٹروے اسلام آباد کے ٹول پلازہ پراحتجاج کیا گیا اور مظاہرین نے موٹر وے پر اسلام آباد آنےاور جانے والے راستے بند کردیئے تھے۔
فتح جنگ روڈ اور موٹر وے ایم ون انٹر چینج پر بیک وقت دھرنا جاری تھے۔
