پی ٹی آئی چیئرمین اور سابق وزیراعظم عمران خان نے کل کراچی جلسے میں آنے والوں سے درخواست کی ہے کہ وہ اپنے ساتھ قومی پرچم لائیں۔
سابق وزیراعظم نے سماجی رابطوں کی ویب سائٹ ٹوئٹر پر اپنے پیغام میں کل کراچی میں مزار قائد سے متصل باغ جناح میں ہونیوالے پی ٹی آئی کے جلسے میں آنے والوں سے کہا ہے کہ وہ اپنے ساتھ قومی پرچم لائیں۔
پی ٹی آئی چیئرمین عمران خان نے مزید کہا کہ یہ اب پاکستان کی خود مختاری اور حقیقی جمہوریت کی جنگ ہے۔
انہوں نے کہا کہ یہ لڑائی امریکا کی طرف سےاکسائی گئی حکومت کی تبدیلی کیخلاف ہے، یہ لڑائی تبدیلی کی حمایت کرنیوالے مقامی میر جعفروں کیخلاف ہے۔
My request to all those attending our jalsa in Karachi is to carry our Pakistan flag as this is now a fight for Pakistan's sovereignty & haqeeqi (real) democracy, & against US-instigated regime change, supported by local Mir Jafars. #امپورٹڈ_حکومت_نامنظور
— Imran Khan (@ImranKhanPTI) April 15, 2022
دوسری جانب پی ٹی آئی کو کراچی میں کل جلسے کی اجازت مل گئی جلسے کیلیے این او سی ڈپٹی کمشنر شرقی نے جاری کیا۔
انتظامیہ کی جانب سے 20شرائط سےمشروط اجازت نامہ جاری کیا گیا جس کے مطابق پی ٹی آئی کو جلسہ رات 12بجے تک نمٹانا ہوگا، جلسے میں ملکی نظریات،مذہب کیخلاف کوئی تقریر نہیں ہوگی ، اسلحے کا استعمال ممنوع ہوگا جب کہ جلسے کی داخلی سیکیورٹی آرگنائزر کی ذمہ داری ہوگی۔
انتظامیہ کی جانب سے کہا گیا ہے کہ مذکورہ احکامات کی عدم پیروی کی صورت میں قانونی کارروائی کی جائے گی۔
