چیئرمین تحریک انصاف عمران خان کی جانب سے حفاظتی ضمانت کی درخواست لاہورہائیکورٹ میں دائر کر دی گئی۔
انسداددہشت گردی عدالت نے الیکشن کمیشن کے باہر احتجاج کے کیس میں پی ٹی آئی چیئرمین عمران خان کی عبوری ضمانت خارج کردی تھی۔
عبوری ضمانت خارج ہونے کے بعد عمران خان نے حفاظتی ضمانت کے لیے لاہور ہائیکورٹ سے رابطہ کر لیا ہے۔ عمران خان کی حفاظتی ضمانت کی درخواست سماعت کیلئے مقرر کر لی گئی ہے اور جسٹس طارق سلیم شیخ کچھ دیر میں سماعت کریں گے۔
چیئرمین تحریک انصاف عمران خان نے درخواست میں کہا ہے کہ سابق وزیراعظم اورملک کی ایک بڑی جماعت کا سربراہ ہوں، آزادی مارچ کےدوران جان لیواحملہ ہواجس سےزخمی ہوگیا جس کی وجہ سے اپنی رہائش گاہ سے باہر نہیں جاسکتا۔
درخواست میں کہا گیا ہے کہ زخمی ہونےکی وجہ سےاسلام آبادعدالت میں پیش نہ ہوسکا اور انسداددہشت گردی عدالت نےعدم پیشی پرضمانت خارج کر دی، متعلقہ عدالت سے رجوع کرنا چاہتا ہوں خدشہ ہے پولیس گرفتار کر لے گی لہذاٰ استدعا ہے کہ عدالت حفاظتی ضمانت منظور کرے۔
