اٹک : چیئرمین پی ٹی آئی کے خلاف سائفر کیس کی سماعت آج اٹک جیل میں ہوگی، اس موقع پر جیل کے باہر سیکیورٹی کے سخت انتظامات کئے گئے ہیں۔
تفصیلات کے مطابق سائفر کیس میں چیئرمین پی ٹی آئی کا 14 روزہ جوڈیشل ریمانڈ مکمل ہونے پر کیس کی سماعت آج دوبارہ اٹک جیل میں ہوگی، جج ابو الحسنات محمد ذوالقرنین اٹک جیل میں ہی سماعت کریں گے۔
سائفر کیس کی سماعت کے باعث اٹک جیل کےباہر سیکیورٹی کے سخت انتظامات کئے گئے ہیں، چیئرمین پی ٹی آئی کی لیگل ٹیم اٹک جیل کےباہر پہنچ گئی ہے۔
وزارت قانون وانصاف کےنوٹی فیکشن کے مطابق مقدمہ کی سماعت سیکیورٹی وجوہات کےسبب جیل میں رکھی گئی ہے۔
خیال رہے اسلام آباد ہائیکورٹ سائفرکیس کی سماعت اٹک جیل میں کرنے کے وزارت قانون کے نوٹیفکیشن کیخلاف درخواست پر فیصلہ محفوظ کرچکی ہے۔
گزشتہ روزچیئرمین پی ٹی آئی کی اہلیہ بشریٰ بی بی اوربہن نورین نیازی جیل میں ملاقات کی تھی ، جیل سپرنٹنڈنٹ کےدفترمیں ہونےوالی ملاقات میں پی ٹی آئی کی لیگل ٹیم بھی موجود تھی۔
ذرائع نےبتایا تھا سوا گھنٹے کے دورانیے کی ملاقات سپرنٹنڈنٹ جیل کے دفترمیں ہوئی ، رسمی گفتگو کےدوران چیئرمین پی ٹی آئی کوکارکنوں کے جذبات سےمتعلق آگاہ کیا گیا تھا ، ملاقات کے بعد نورین نیازی نےمیڈیا سےغیر رسمی گفتگو میں بتایا تھا کہ چیئرمین پی ٹی آئی قید کے باوجود قوم کے لیے جدوجہد جاری رکھنے کیلئے پرعزم ہیں۔
