آکسفورڈ : برطانیہ میں کورونا کی گرفت کمزور ہونے لگی، متاثرہ افراد کی تعداد میں مسلسل کمی آنے لگی۔
قومی ادارہ شماریات کے تازہ اعداد و شمار کے مطابق ایک دن میں کورونا کے شکار افراد کی تعداد 8ہزار سے کم ہو کر 5600 ہو گئی ہے۔
یہ نتائج 9 ہزار گھرانوں کے 19 ہزار افراد کے کورونا ٹیسٹ کے نتائج کی بنیاد پر اخذ کیے گئے ہیں، دو ہفتے قبل ہر 4سو افراد میں سے ایک شخص کورونا کا شکار بنا اب یہ شرح ایک ہزار میں سے ایک شخص تک پہنچ گئی ہے۔
ادارہ شماریات کا کہنا ہے کہ 885 افراد کے اینٹی باڈیز ٹیسٹ مثبت لیکن کورونا علامت موجود نہیں ہے جب کہ گھروں سے باہر کام کرنے والوں کی اکثریت کورونا کے متاثرین میں شامل ہیں۔
اس کے علاوہ اسپتالوں اور کئیر ہومز کے ورکرز کورونا کے آسان شکار بنے ہیں۔
یکم جون کو برطانوی وزیر اعظم بورس جانسن نے کورونا کا زور ٹوٹنے پر ملک بھر میں 5 افراد کے گھر سے باہر اکٹھے ہونے اور ملاقات کرنے کی اجازت دی تھی۔
سماجی رابطے کی ویب سائٹ ٹوئٹر پر جاری بیان میں وزیراعظم بورس جانسن کا کہنا تھا کہ آج سے 5 افراد گھر کے اندر یا باہر اکٹھے وقت گزار سکتے ہیں یہ لوگوں کے لیے خوشی اور راحت کا لمحہ ہے۔
برطانوی وزیراعظم بورس جانسن نے عوام سےسماجی فاصلہ قائم رکھنےکی اپیل کرتے ہوئے ہاتھ دھونے اور احتیاطی تدابیر اختیار کرنے پر زور دیا۔
