کویت میں سفاک شامی شہری نے ماں کو قتل کرنے کے بعد پولیس اہلکار کو چھریوں کے وار کر کے موت کے گھاٹ اتار دیا۔
کویتی میڈیا کے مطابق پولیس اہلکار کے لرزہ خیز قتل کی واردات میں ملوث ملزم سیکورٹی فورسز سے فائرنگ کے تبادلے میں مارا گیا۔
ٹریفک قوانین کی خلاف ورزی پر جرمانے کا ٹکٹ دینے پر ملزم نے پولیس اہلکار پر حملے کر دیا اور اس وقت تک وار کرتا رہا ہے جب تک اسے اہلکار کی موت کا یقین نہیں ہو گیا۔
حملہ آور کے پے در پے وار سے پولیس اہلکار عبدالعزیز الرشیدی موقع پر ہی جاں بحق ہو گیا جس کے بعد ملزم پولیس اہلکار کا ہتھیار لے کر موقع واردادت سے فرار ہو گیا۔
تفتیشی پولیس نے ملزم کی شناخت کے بعد اس کی کھوج لگائی اور فارم ہاؤس میں چھپے ملزم کو گھیر لیا اور اسے ہتھیار ڈالنے کا کہا جس پر اس نے فائرنگ شروع کر دی۔
پولیس اور ملزم کے درمیان فائرنگ کا تبادلہ ہوا جس کے نتیجے میں گولی لگنے سے ملزم زخمی ہوا اور بعدازاں اسپتال میں دم توڑ گیا۔ ملزم کی تصویر سے پتہ چلا کہ اسی شخص نے پہلے القصور کے علاقے میں اپنی والدہ کو قتل کیا پھر مھبولا چلا گیا جہاں پولیس اہلکار کو شہید کرنے کے بعد روپوش ہو گیا۔
جاں بحق پولیس اہلکار کی نماز جنازہ میں اسپیکر قومی اسمبلی، اعلیٰ حکومتی و انتظامی عہدیدار، پولیس افسران اور دیگر اہم شخصیات نے شرکت کی۔
