جہیز کی فرسودہ رسم عرصہ دراز سے چلی آرہی ہے، امیر گھرانے سے لے کر غریب طبقے تک ہر کوئی اس رسم کو نبھاتا چلا جاتا ہے، کہیں کم تو کہیں زیادہ لیکن ہر صورت ماں باپ اپنی بیٹی کو جہیز دے کر ہی رخصت کرتے ہیں۔
لیکن آج کے دور میں بھی ایسے لوگ موجود ہیں جو کم جہیز آنے پر اسے اپنی شان اور عزت کے خلاف سمجھتے ہیں جس کی وجہ سے ظلم اور تشدد جیسے جرائم جنم لے رہے ہیں۔
ایسی ہی ایک ظلم بھارت کی ریاست راجستھان کے سوائی مادھو پور میں پیش آیا ہے جہاں ایک گاؤں میں سسرال والوں نے مبینہ طور پر جہیز کے مطالبہ پر اپنی بہو کو زندہ جلا دیا۔
دولہے کو جہیز میں موٹرسائیکل مانگنا مہنگا پڑگیا، ویڈیو وائرل
اس واقع کی اطلاع ملنے پر مذکورہ لڑکی کو اسپتال پہنچایا گیا جہاں وہ زخموں کی تاب نہ لاتے ہوئے جان کی بازی ہار گئی۔
پولیس کے مطابق متاثرہ لڑکی کے والد نے رپورٹ درج کروائی جس میں بتایا گیا ہےکہ لڑکی کی شادی 6 ماہ قبل ہوئی تھی ۔
والد نے بیان میں کہا کہ ‘ میں نے اپنی بیٹی کو ضرورت کی تمام چیزیں دی تھیں، لیکن سسرال والوں نے مزید ایک موٹرسائیکل اور 50 ہزار روپے کا مطالبہ کرتے ہوئے میری بیٹی کو تشدد کا نشانہ بنانا شروع کر دیا جس کے بعد میری بیٹی کو زندہ جلا دیا۔
اطلاعات کے مطابق مذکورہ لڑکی کے سسرال والوں پر قتل کا مقدمہ درج کردیا گیا ہے جبکہ لڑکی کی لاش کو پوسٹ مارٹم کے بعد لواحقین کے حوالے کر دیا گیا۔
