سعودی عرب سمیت دیگر عرب ممالک میں کل شب حسین فلکیاتی نظارہ دیکھنے کو ملے گا جب آسمان سے شہابیے بارش کی طرح زمین پر برسیں گے۔
غیر ملکی میڈیا کے مطابق جدہ میں فلکیاتی انجمن نے بتایا ہے کہ ہفتہ اور اتوار کی شب سورج طلوع ہونے سے قبل سعودی عرب سمیت دیگر عرب ممالک میں آسمان سے تیزی کے ساتھ شہابیوں کی برسات ہوگی اور ایک گھنٹے میں اوسطاً 8 شہابیے نیچے زمین کی طرف آئیں گے۔
فلکیاتی انجمن کے سربراہ ماجد ابو زاہرۃ نے بتایا کہ شہابیوں کی بارش ہر سال ہوتی ہے اور ایسے موقع پر رات کے وقت آسمان کا منظر بے حد دلکش لگتا ہے۔
تاہم کل شب ہونے والی شہابیوں کی بارش غیر معمولی طور پر سابقہ تمام ایسے فلکیاتی نظاروں سے خوبصورت ہوگی کیونکہ آسمان بالکل صاف اور چاند بھی قمری مہینے کی آخری ہفتہ ہونے کے باعث ہلال کی شکل اختیار کر چکا ہوگا۔ اس موقع پر تاریک آسمان سے چھوٹے چھوٹے گرتے شہابیے سب با آسانی دیکھ سکیں گے۔
