نیویارک : اقوام متحدہ کے پناہ گزین کمیشن نے اپنی رپورٹ میں انکشاف کیا ہے کہ مجموعی طور پر گذشتہ 20 برسوں میں دنیا بھر میں تارکین وطن اور بے گھر افراد کی تعداد دُوگنی ہوگئی۔
تفصیلات کے مطابق اقوام متحدہ نے اعلان کیا ہے کہ 2018 میں 7 کروڑ سے زیادہ پناہ گزینوں یا مہاجرین کا اندراج عمل میں آیا۔ یہ ایک ریکارڈ ہے مگر یہ تعداد گھروں کو چھوڑنے والے افراد کی حقیقی تعداد سے کم ہے۔
پناہ گزینوں کے لیے اقوام متحدہ کے کمیشن نے اپنی سالانہ رپورٹ میں بتایا ہے کہ 7 کروڑ 8 لاکھ پناہ گزینوں کی تعداد محتاط عدد ہے۔ بالخصوص جب کہ وینزویلا میں بحران کے سبب فرار ہونے والے افراد کی تعداد کا مکمل طور پر شمار نہیں کیا جاسکا۔
غیر ملکی خبر رساں ادارے کا کہنا تھا کہ سال 2017 کے اختتام پر تشدد کے سبب گھروں کو چھوڑ دینے پر مجبور ہونے والے افراد کی مجموعی تعداد 6.85 کروڑ تھی۔
پناہ گزین کمیشن کے مطابق بڑھتی ہوئی تعداد کی وجہ ایتھوپیا میں نسلی تنازعات اور وینزویلا کا بحران ہے، یہاں معیشت کے ڈھیر ہونے کے سبب خوراک اور دواؤں میں قلت کے باعث روزانہ ہزاروں افراد راہ فرار اختیار کر رہے ہیں۔
اقوام متحدہ کے اندازے کے مطابق 2016 کے اوائل کے بعد ے وینزویلا سے فرار ہونے والے افراد کی تعداد تقریبا 33 لاکھ ہے، مجموعی طور پر گذشتہ 20برسوں میں دنیا بھر میں تارکین وطن اور بے گھر افراد کی تعداد دو گنا ہو گئی ہے۔
