یونان: ورلڈ بیچ ریسلنگ سیریز میں انعام بٹ نے گولڈ میڈل جیت لیا۔
تفصیلات کے مطابق یونان میں منعقدہ ورلڈ بیچ ریسلنگ سیریز میں پاکستانی ریسلر انعام بٹ نے فائنل میں آذربائیجان کے حریف کو شکست دے کر گولڈ میڈل اپنے نام کر لیا۔
گجرانوالہ سے تعلق رکھنے والے انعام بٹ نے ایونٹ کی 90 کلوگرام کٹیگری میں حصہ لیا تھا، یہ ان کا رواں ماہ دوسرا گولڈ میڈل ہے۔
یونان کے شہر ایتھنز میں پاکستانی ریسلر انعام بٹ کی شاندار کارکردگی کا سلسلہ مسلسل جاری رہا تھا، پاکستانی ریسلر نے مقابلے کے لیے آنے والے تمام پہلوانوں کو پچھاڑتے ہوئے فائنل میں جگہ بنائی۔
انعام بٹ نے ورلڈ بیچ سیریز ریسلنگ میں گولڈ میڈل جیت لیا
سیمی فائنل مقابلے میں انھوں نے یوکرائن کے پہلوان کو تین، ایک سے شکست دی تھی، جب کہ کوارٹر فائنل ميں انعام بٹ نے رومانيہ کے ريسلر کو تین، صفر سے شکست دے دی تھی۔
اس سے قبل رواں ماہ کی چار تاریخ کو انعام بٹ نے بیچ سیریز ریسلنگ کی فری اسٹائل کیٹیگری میں بھی طلائی تمغہ اپنے نام کیا تھا۔
دوسری جانب پاکستان کے دوسرے ریسلر زمان انور کو آذربائیجان کے ریسلر کے ہاتھوں سیمی فائنل میں شکست ہوئی تھی۔
