The news is by your side.

Advertisement

یہ واقعہ ہمارے نظام کے بارے میں سنجیدہ سوالات اٹھا رہا ہے: شہباز شریف

لاہور: صدر مسلم لیگ ن شہباز شریف نے گجرپورہ زیادتی واقعے سے متعلق کہا ہے کہ یہ واقعہ ہمارے نظام کے بارے میں سنجیدہ سوالات اٹھا رہا ہے، محافظ بچوں کے سر پر دستِ شفقت رکھنے کی بجائے اعتراض اٹھا رہا ہے۔

انھوں نے آج لاہور میں وکلا کنونشن سے خطاب کرتے ہوئے کہا لنک روڈ واقعے نے ہمارے نظام پر سنجیدہ سوالات اٹھا دیے ہیں، ملزمان کی گرفتاری کی بجائے کہا جاتا ہے قوم کی بیٹی رات کو کیوں نکلی؟ محافظ کہہ رہا ہے خاتون نے پٹرول کیوں چیک نہیں کیا؟ عہدوں پر کیسے تقرریاں ہو رہی ہیں، سب جانتے ہیں۔

شہباز شریف نے کہا قوم کو یاد ہے زینب واقعہ ہوا تو کس طرح اسے سیاست کی نذر کیا گیا، زینب کیس کو اس وقت پی ٹی آئی نے سیاسی مقاصد کے لیے استعمال کیا، میں صبح 3 بجے قصور میں بچی کے والد سے ملا اور انصاف فراہمی کا وعدہ کیا۔

ان کا کہنا تھا مجرم کی گرفتاری اور قانون کے مطابق سزا ہونے تک ہم سوئے نہیں، بہترین تفتیش کے ذریعے ہم نے مجرم کو کیفر کردار تک پہنچایا، وقت نے ثابت کیا کہ جو گرجتے ہیں وہ برستے نہیں، 73 سال بعد ہم کہاں کھڑے ہیں، سب بہتر جانتے ہیں۔

گجرپورہ کیس ، زیادتی کا شکار خاتون اور ملزم کا ڈی این اے میچ کرگیا

واضح رہے کہ لاہور میں لنک روڈ پر خاتون سے زیادتی کا مرکزی ملزم پکڑا گیا ہے، ذرایع کا کہنا ہے کہ پنجاب پولیس نے گزشتہ رات ملزم کو گرفتار کیا، ملزم کا ڈی این اے جائے وقوعہ سے ملنے والے نمونے سے میچ کر گیا ہے، ملزم کا نام عابد علی ولد اکبر علی ہے اور وہ فورٹ عباس کا رہائشی، عمر 27 سال ہے۔

ذرایع کے مطابق ملزم نے ساتھیوں کے ساتھ مل کر 2013 میں گھر میں گھس کر ماں بیٹی سے بھی زیادتی کی تھی۔

Comments

یہ بھی پڑھیں