کراچی : سندھ میں ڈینگی نے ایک بار پھر سر اٹھا لیا، رواں ماہ اگست میں صوبے بھر میں اب تک کے درج ہونے والے کیسز کی تعداد میں تیزی سے اضافہ ہوا ہے۔
تفصیلات کے مطابق ڈینگی مچھر سے پھیلنے والی بیماریوں سے ہر سال لاکھوں لوگ متاثر ہوتے ہیں جس کے باعث مریضوں کی بڑی تعداد جان سے بھی چلی جاتی ہے۔
اس حوالے سے تازہ ترین اطلاعات کے مطابق صوبہ سندھ میں رواں سال اگست تک ڈینگی کیسز کی تعداد896 ہوگئی، صرف کراچی شہر میں رواں اگست میں اب تک ڈینگی کے سب سے زیادہ 731کیسز کی رپورٹ ہوئے
ڈائریکٹر جنرل ہیلتھ سروسز سندھ کی رپورٹ کے مطابق کراچی کے ضلع شرقی میں 291کیسز، ضلع وسطی میں 126کیسز، ضلع کورنگی میں 79اور ضلع جنوبی میں 136کیسز رپورٹ ہوئے ہیں۔ اس کے علاوہ ضلع غربی میں 20 اور ضلع ملیر میں 40 ڈینگی کیسز سامنے آئے۔
رپورٹ کے مطابق ضلع کمیاڑی میں 39کیس، ضلع حیدرآباد میں 103کیس، ضلع میر پورخاص میں ڈینگی کے31 کیسز رپورٹ ہوئے، ضلع سکھر میں 13کیسز، شہید بےنظیرآباد میں 4کیسز جبکہ لاڑکانہ میں ڈینگی کے 14کیسز سامنے آئے ہیں۔
واضح رہے کہ موسم گرما کے بعد اور سردیوں سے قبل مون سون سیزن میں ڈینگی مچھر کی پیداوار ہوتی ہے جس کے باعث مذکورہ وائرس پھیل جاتا ہے۔ رواں سال ڈینگی وائرس سے سندھ میں متعدد شہریوں کی اموات بھی ہوئیں تاہم ملک کے دیگر بڑے شہروں میں ڈینگی کے حوالے سے ہیلتھ ایمرجنسی بھی نافذ کی گئی تھی۔
