لاہور : صوبہ پنجاب میں آٹے کی قلت اور اس کی قیمت میں کیے جانے والے اضافے کو کنٹرول کرنے کے لیے صوبائی حکومت متحرک ہوگئی۔
اس حوالے سے ذرائع کا کہنا ہے کہ وزیراعلیٰ پنجاب چوہدری پرویزالٰہی نے گندم آٹے کی قیمتوں پر ناراضی کا اظہار کرتے ہوئے سیکرٹری فوڈ اور ڈائریکٹر کی سرزنش کی اور شدید برہمی کا اظہار کیا۔
وزیراعلیٰ پنجاب نے متعلقہ افسران سے کہا کہ صوبے کے عوام آٹے سے پریشان اور واویلا مچاتے دکھائی دے رہے ہیں اور آپ دفتروں میں سکون سے بیٹھے کیا کارکردگی دکھا رہے ہیں؟
چوہدری پرویز الہیٰ نے متعلقہ حکام کو ہدایت دی کہ آٹے کی قیمتوں کو فوری طور پر معمول پر لایا جائے، ہم نے لوگوں سے وعدے کر رکھے ہیں کہ صوبے میں گڈ گورننس ہوگی
انہوں نے متعلقہ افسران کو ہدایت کی کہ صوبے بھر میں فوری طور پر آٹے کی قیمتوں کو کنٹرول کیا جائے اور ناجائز منافع خوری کرنے والوں کے خلاف سخت ایکشن لیا جائے۔
انہوں نے افسران سے استفسار کیا کہ پنجاب نے گندم کوٹہ اور اس کی امدادی قیمت بھی بڑھادی ہے اس کے باوجود یہ حال کیوں ہے؟ ہدایات ملنے کے بعد ڈائریکٹر فوڈ نے تمام اسٹیک ہولڈرز کا اجلاس طلب کرلیا۔
