اسلام آباد : رواں سال انکم ٹیکس ریٹرن فائل کرنے کی تعداد میں ساڑھے 23 لاکھ کا اضافہ ہوا، 18 لاکھ 53 ہزار 601 افراد نے 2024 کیلئے ریٹرن فائل کئے۔
تفصیلات کے مطابق گزشتہ سال کی نسبت انکم ٹیکس ریٹرن فائل کرنے کی تعداد میں ساڑھے 23 لاکھ کا اضافہ ریکارڈ کیا گیا۔
ایف بی آر کی جانب سے کہا گیا ہے کہ اب تک 48 لاکھ 78 ہزار 870 سے زائد افراد ریٹرن جمع کرا چکے ہیں، 18 لاکھ 53 ہزار 601 افراد نے 2024 کیلئے ریٹرن فائل کی۔
گزشتہ مالی سال اسی عرصے کے دوران ٹوٹل 25 لاکھ 29 ہزار ریٹرن فائل ہوئے تھے جبکہ گزشتہ مالی سال اسی عرصے کے دوران 8 لاکھ 97 ہزار ریٹرن بھی فائل ہوئے تھے۔
سال 2024 کے گوشوارے جمع کرانے کیلئے تاریخ میں توسیع کا فیصلہ 31 اکتوبرکو ہوسکتا ہے ، تاریخ میں توسیع نہ ہونے پر انفرادی طور پر ریٹرن فائل کرنے کیلئے درخواست دی جا سکتی ہے۔
یاد رہے فیڈرل بورڈ آف ریونیو (ایف بی آر) نے انکم ٹیکس گوشوارے جمع کرانے کی آخری تاریخ 31 اکتوبر تک توسیع کی تھی۔
اس حوالے سے ایف بی آر حکام کا کہنا تھا کہ گوشوارے جمع کرانے کی تاریخ میں توسیع بینک تعطیلات کی وجہ سے کی گئی ہے۔
واضح رہے کہ ایف بی آر کو 30 ستمبر 2024 تک تقریباً 36 لاکھ 60 ہزار انکم ٹیکس گوشوارے موصول ہوئے تھے جو گزشتہ سال کی اسی مدت کے دوران موصول ہونے والے گوشواروں 19 لاکھ 50 ہزار کے مقابلے میں تقریباً 88 فیصد زیادہ ہے۔ گزشتہ برس 62 لاکھ 40 ہزار ریٹرن فائل کیے گئے تھے۔
