کراچی : نجی اسکولوں کی انتظامیہ نے بغیر کسی جواز کے فیسوں میں من مانا اضافہ کردیا ہے جب کہ والدین پر یکمشت تین ماہ کی فیس جمع کروانے کے لیے دباؤ ڈالا جا رہا ہے۔
تفصیلات کے مطابق کراچی میں نئے تعلیمی سال کا آغاز ہوا نہیں کہ بیشتر نجی اسکولوں کی انتظامیہ نے فیسوں میں من مانا اضافہ کردیا گیا ہے جب کہ کچھ اسکولوں کی جانب سے والدین کو 3 ماہ کی فیس یکمشت ادا کرنےکا چالان بھی جاری کردیا گیا ہے۔
اس حوالے والدین کا کہنا ہے کہ ڈائریکٹر پرائیویٹ انسٹی ٹیوشن کی جانب سے کسی قسم کی تادیبی کارروائی سےگریز کیا جا رہا ہے اور نجی اسکولز کی حالتِ زار اور تعلیمی معیار جانچنے کے لیے بغیر اطلاع کے کیے جانے والے ’’سرپرائز وزٹ‘‘ بھی نہیں کیے جا رہے ہیں جس کے باعث نجی اسکول کی انتظامیہ بے باک اور بے خوف ہو گئی ہے۔
والدین نے مزید بتایا کہ فیسوں میں من مانے اضافے کو رد کرنے والے بچوں کو امتحانات میں شرکت سے روک دیاجاتا ہے جب کہ سزا کے طور پر بعض طالب علموں کے اسکول بیگ ضبط کرنے کی شکایات بھی سامنے آئی ہیں جس کے بعد آدھی فیس ادا کرنے والے طالب علموں کے اسکول بیگ واپس کیےجاتے ہیں۔
