بھارت نے پہلگام میں سیاحوں کی حفاظت میں ناکامی کا اعتراف کرلیا۔
آل انڈیا کانگریس کمیٹی کے صدر ملیکارجم کھرگے نے کہا کہ حکومت نے پہلگام میں سیاحوں کی حفاظت میں ناکامی کا اعتراف کیا ہے لیکن اپوزیشن تعاون جاری رکھے گی۔
انہوں نے کہا کہ حکومت نے جمعرات کو آل پارٹیز میٹنگ کے دوران تصدیق کی کہ حملے کی وجہ سیکیورٹی کی ناکامی ہے۔
بھارت کی پارلیمنٹ میں اپوزیشن لیڈر کھرگے نے کہا کہ تین مرحلوں پر مشتمل سیکیورٹی پلان موجود تھا لیکن بالآخر ناکام رہا۔
سکیورٹی اور انٹیلی جنس کی ناکامی پر کانگریس سمیت بھارتی اپوزیشن جماعتوں نے مودی حکومت کو کٹہرے میں کھڑا کردیا اور 5 اہم سوال پوچھ لیے۔
اپوزیشن جماعتوں کی جانب سے مودی حکومت سے سوالات کیے گئے کہ پہلگام حملہ کیسے ہوا؟ انٹیلی جنس کیسے ناکام ہوئی؟ سرحد پار سے اگر کوئی آیا تو کیسے آیا؟ 26 لوگوں کی موت کا ذمے دار کون ہے؟ کیا وزیر داخلہ امت شاہ استعفیٰ دیں گے اور وزیر اعظم نریندر مودی حملے کی ذمہ داری قبول کریں گے؟
اس سے قبل بدھ کو دارالحکومت نئی دہلی میں وزیردفاع راج ناتھ سنگھ کی زیرصدارت آل پارٹیز کانفرنس ہوئی جس میں بھارتی حکومت نے حالیہ پہلگام حملے میں سکیورٹی اور انٹیلی جنس کی ناکامی کا اعتراف کیا۔
وزیر داخلہ امیت شاہ ماننے پر مجبور ہوگئے کہ پہلگام واقعہ سکیورٹی اور انٹیلی جنس کی ناکامی ہے۔
کانگریس کا کہنا تھا کہ پہلگام حملے میں انٹیلی جنس ناکامی اور سکیورٹی کی خامی کا جامع تجزیہ ہونا ضروری ہے، عوامی مفاد میں اس انٹیلی جنس ناکامی اور سکیورٹی خامیوں پر سوالات اٹھانے چاہئیں۔
کانگریس کی جانب سے اس سکیورٹی ناکامی کا ذمہ دار بھارت کی نریندر مودی حکومت کو قرار دیا گیا۔کانگریس رہنما راہول گاندھی نے کہا کہ آخر پہلگام میں سکیورٹی کیوں نہیں تھی۔
