آندھرا پردیش: بھارتی ریاست آندھرا پردیش میں ایک نہایت دل دہلا دینے والا واقعہ پیش آیا ہے، جس میں ایک سابق عاشق نے 16 سالہ طالبہ کو اس لیے آگ لگا کر جان سے مار دیا کیوں کہ وہ اس سے شادی کا تقاضا کرنے لگی تھی۔
اس واقعے کی ایک نہایت دل دہلا دینے والی ویڈیو سوشل میڈیا پر اپ لوڈ کی گئی ہے، جس میں جھلسنے کے بعد لڑکی کو پولیس اور ریسکیو ارکان ریسکیو کر کے اسپتال منتقل کر رہے ہیں۔
ریاست کے ضلع کڑپہ کے بدویل ٹاؤن کی پولیس رپورٹ کے مطابق وی وگنیش نامی شخص نے چند ماہ قبل اپنی مقتولہ دوست سے رشتہ ختم کر دیا تھا، اور دوسری لڑکی سے شادی کر لی تھی، جس پر وہ اس سے شادی کا تقاضا کر رہی تھی۔
پولیس رپورٹ کے مطابق وگنیش نے مبینہ طور پر ٹاؤن کے مضافات میں ہفتے کے 10 بجے کے قریب لڑکی پر پٹرول چھڑک کر اسے آگ لگا دی، جس کے نتیجے میں وہ شدید جھلس گئی تھی، اور اسے علاج کے لیے مقامی اسپتال لے جایا گیا، لیکن اتوار کو 3 بجے شب وہ زخموں کی تاب نہ لاتے ہوئے دم توڑ گئی۔
پولیس کے مطابق ملزم نے وگنیش نے لڑکی کے مطالبے سے تنگ آ کر یہ انتہائی قدم اٹھایا تھا، جس کے بعد وہ فرار ہو گیا تھا، تاہم پولیس نے وگنیش کو بعد ازاں گرفتار کر کے اس کے خلاف پوکسو ایکٹ سمیت مختلف دفعات کے تحت کیس درج کر لیا ہے۔
متاثرہ لڑکی انٹرمیڈیٹ سال اول کی طالبہ تھی‘ موت سے قبل اپنا بیان ریکارڈ کراتے ہوئے لڑکی نے کہا کہ وگنیش نے مجھے آگ لگائی کیوں کہ میں نے اس سے کہا تھا کہ وہ مجھ سے شادی کرے۔ ڈاکٹروں کے مطابق واقعے میں لڑکی 80 فی صد جھلس گئی تھی۔
