بھارت نے اپنی فوج کو مزید طاقتور بنانے کے لیے 5.4 بلین ڈالر کے لڑاکا طیارے، میزائل اور جنگ میں استعمال ہونے والے الیکٹرانک سسٹم کی خریداری کی منظوری دے دی ہے۔
غیرملکی خبر رساں ادارے روئٹرز کی رپورٹ کے مطابق سرکاری بیان میں کہا گیا ہے کہ بھارتی فوج کے لیے سرمائے کے حصول کی منظوری دینے والے اعلیٰ ادارے ڈیفنس ایکوزیشن کونسل (ڈی اے سی) نے تمام سروسز کے لیے 450 بلین روپے ($ 5.41 بلین) کے دفاعی ساز و سامان خریدنے کی نو تجاویز کی منظوری دی۔
ڈیفنس ایکوزیشن کونسل (ڈی اے سی) نے بحریہ کے لیے سروے کے جہازوں کے علاوہ 12 ایس یو 30 طیارے اور مختصر فاصلے تک مار کرنے والے میزائل اور فضائیہ کے لیے زمین سے زمین پر مار کرنے والے میزائل کی منظوری دی۔
اس کے علاوہ کونسل نے ہلکی بکتر بند ملٹی پرپز گاڑیاں، ایک مربوط نگرانی اور ہدف سازی کا نظام اور ہائی موبلٹی گن ٹونگ گاڑیوں کی خریداری کی بھی منظوری دی۔
