بنگلورو: ورلڈ ٹی ٹوئنٹی کے اہم میچ میں سخت مقابلے کے بعد بھارت نے بنگلا دیش کو ایک رنز سے شکست دے دی۔
ٹی ٹوئنٹی ورلڈکپ کے اہم میچ میں بھارت نے پہلے بیٹنگ کرتے ہوئے مقررہ 20 اوورز میں سات وکٹوں کے نقصان پر ایک سو چھیالیس رنز بنائے جس کے جواب میں محمد متھن اور تمیم اقبال نے اننگز کا آغاز کیا، متھن صرف ایک رنز پر ہی پویلین لوٹ گئے۔ تمیم نے شبیر الرحمان کے ساتھ ملر دوسری وکٹ کیلیے چوالیس رنز کی شراکت قائم کی۔
تمیم 35 رنز کی اننگز کھیل کر آؤٹ ہوئے جب کہ شبیر الرحمان نے 26 رنز بنائے، شکیب الحسن نے بھی 22 رنز کی اننگز کھیلی جب کہ کپتان مشرفی مرتضیٰ 6 رنز ہی بناسکے، سومیا سرکار اور محمد اللہ نے چھٹی وکٹ کیلیے 31 رنز کی شراکت داری قائم کی، سومیا 21 رنز بنا کر آؤٹ ہوئے۔
بنگلا دیش کو آخری اوور میں مشفق الرحیم اور محمد اللہ کی وکٹ پر موجودگی میں 11 رنز درکار تھے، مشفق نے دوسری اور تیسری گیند پر چوکا مارکر جیت کی راہ ہموار کردی لیکن پانڈیا نے چوتھی اور پانچویں گیند پر دونوں کھلاڑیوں کو آؤٹ کرکے میچ اور سنسنی خیز بنادیا۔
انڈیا کی جانب سے ایشون اور جڈیجا نے 2،2 جب کہ رائنا اور اشیش نہرا نے ایک ایک وکٹ حاصل کی۔
اس سے قبل بنگلادیش کے کپتان مشفق الرحیم نے ٹاس جیت کر بھارت کو بیٹنگ کی دعوت دی، بھارتی کھلاڑیوں نے اننگز کا آغاز انتہائی محتاط انداز میں کیا اور بھارتی اوپنرز نے ٹیم کو 42 رنز کا آغا زفراہم کیا، ویرات کوہلی اور سریش رائنا نے تیسری وکٹ کیلیے 50 رنز کی شراکت داری قائم کی۔
ویرات 24 ، رائنا 30، ہارک پانڈیا 15 رنز بنا کر آؤٹ ہوئے جب کہ یووراج سنگھ بھی صرف 3 رنز ہی بناسکے۔ جڈیجا نے دھونی کے ساتھ ملکر 20 رنز کی تیز شراکت قائم کی لیکن جڈیجا 12 رنز پر آؤٹ ہوئے جب کہ کپتان دھونی 13 رنز پر ناٹ آؤٹ رہے۔
بنگلا دیش کی جانب سے مستفیض الرحمان اور الامین نے 2،2 جب کہ شکیب، محمد اللہ اور شوواگاتا نے ایک ایک وکٹ حاصل کی۔
