بھارتی حکومت نے نئے بجٹ میں اپنے متوسط طبقے کو بڑا ریلیف دیتے ہوئے ماہانہ ایک لاکھ بھارتی روپے آمدن والوں کو ٹیکس استثنا دے دیا ہے۔
بھارت کی وزیر خزانہ نرملا سیتا رمن نے نئے مالی سال کے بجٹ کا اعلان کر دیا ہے جس میں ماہانہ ایک لاکھ بھارتی روپے (پاکستانی کرنسی میں 3 لاکھ روپے سے زائد) آمدنی والے شہری کو انکم ٹیکس سے استثنا دیا گیا ہے۔
بھارت کی کل آبادی کا چالیس فیصد مڈل کلاس پر مشتمل ہے اور بھارتی میڈیا کے مطابق اگر کسی شخص کی سالانہ تنخواہ 12 لاکھ روپے تک ہے، تو اسے انکم ٹیکس کی مد میں 60 سے 70 ہزارتک کی بچت ہوگی۔
تاہم ماہر معاشیات ارن کمار کہتے ہیں مڈل کلاس کو ڈائریکٹ ٹیکسوں میں چھوٹ دینے سے بہتر تھا کہ حکومت بلواسطہ ٹیکسوں میں کمی لاتی۔
بھارت میں اس وقت مختلف مصنوعات اورخدمات پرڈائریکٹ ٹیکس کی شرح 28 فیصد تک ہے۔ ایک ارب چالیس کروڑ کی آبادی میں صرف 9 کروڑ پچاس لاکھ افراد ٹیکس ریٹرن فائل کرتے ہیں۔ ان میں سے 6 کروڑ افراد زیرو ریٹرن فائل کرتے ہیں۔
