بھارت میں کانگریس کے صدر ملکارجن کھڑگے نے آج یوپی کے مختلف علاقوں میں تقاریر کے دوران مودی کا اصل چہرہ بے نقاب کیا۔
غیر ملکی ذرائع ابلاغ کے مطابق کانگریس صدر نے مودی کو ہر بات پر جھوٹ بولنے والا لیڈر قرار دیا اور کہا کہ ”وزیر اعظم نے مہاراشٹر میں کہا کہ میں یہاں کا پیاز کھا کر اور یہاں کے کپاس سے بنے ہوئے کپڑے پہن کر بڑا ہوا ہوں۔
وہ یہ بھی کہتے ہیں کہ میں نے بھیک مانگ کر اپنی زندگی گزاری۔ وزیر اعظم ہر چیز میں جھوٹ بولتے ہیں، ان کی ایک بھی بات میں سچائی نظر نہیں آتی۔ ایسے لوگوں کے جھانسے میں مت آنا۔
انہوں نے کہا کہ مودی کا جھکاؤ امیروں کی طرف ہے، ہم غریبوں کی طرف ہیں۔ اب آپ کو انتخاب کرنا ہے، کیونکہ یہ انتخاب آپ کے مستقبل کو طے کرے گا۔ اس لیے آپ سبھی متحد ہو جائیں اور آئین و جمہوریت کو بچانے کے لئے اپنا کردار ادا کریں۔
’نریندر مودی کے نام کا باب ختم ہونے جا رہا ہے‘
کانگریس صدر کھڑگے نے کہا کہ ”مشرقی یوپی ہندوستان کی تحریک آزادی کا مرکز رہا ہے۔ ہمارا جلسہ بانس گاؤں پارلیمانی سیٹ کے اسی چوری-چورا علاقہ میں ہو رہا ہے جسے پورا ملک جانتا ہے۔ ہم مودی کا اصل چہرہ بے نقاب کرکے رہیں گے۔
