بھارتی پروازوں کے لیے پاکستانی فضائی حدود کی بندش میں توسیع کے بعد بھارت کی جانب سے بھی بندش میں توسیع کردی گئی۔
اے آر وائی نیوز کی رپورٹ کے مطابق بھارت نے بھی پاکستانی طیاروں کیلئے اپنی فضائی حدود کی بندش میں توسیع کر دی۔
اس حوالے سے نوٹم بھی جاری کردیا گیا ہے جس میں کہا گیا ہے کہ بھارت کی جانب سے فضائی بندش کی مدت 23جون 2025تک ہوگی۔
پاکستانی رجسٹرڈ، آپریٹڈ، ملکیت یا لیز پر لئے گئے تمام طیارے اس پابندی کی زد میں رہیں گے، پاکستانی ایئرلائنز یا آپریٹرز کے زیرانتظام پروازیں بھارت کی حدود استعمال نہیں کر سکے گی۔
یاد رہے کہ گزشتہ روز پاکستانی حدود میں بھارتی طیاروں کی پرواز پر پابندی 24 جون 2025 صبح 4:59 بجے تک بڑھا دی گئی تھی۔
اس سلسلے میں پاکستان ایئر پورٹس اتھارٹی نے بتایا کہ بھارتی طیاروں کی پرواز پر پابندی 24 جون 2025صبح 4 بج کر 59 منٹ تک بڑھائی گئی ہے۔
مزید پڑھیں : بھارتی پروازوں کیلیے پاکستانی فضائی حدود کی بندش میں توسیع
بھارتی رجسٹرڈ، آپریٹڈ، ملکیت یا لیز پر لیے گئے تمام طیارے پابندی کی زد میں رہیں گے، یہ پابندی بھارتی فوجی طیاروں پر بھی لاگو ہوگی۔
یاد رہے کہ 22 اپریل کو بھارت نے مقبوضہ کشمیر کے علاقے پہلگام میں 26 سیاحوں کی مبینہ ہلاکت کا الزام فوری طور پر پاکستان پر عائد کرنے کے بعد سندھ طاس معاہدہ فوری طور پر معطل کرنے کا اعلان کیا تھا۔
جس کے بعد پاکستان نے بھارت کیلئے فضائی حدود، سرحدی آمد و رفت اور ہر قسم کی تجارت بند کرنے کا اعلان کیا تھا، جبکہ بھارتی ہائی کمیشن میں سفارتی عملے کو 30 ارکان تک محدود کرنے کے علاوہ بھارتی دفاعی، بحری اور فضائی مشیروں کو ناپسندیدہ شخصیت قرار دے کر پاکستان چھوڑنے کا حکم دیا تھا۔
