حیدرآباد: بھارتی شہر حیدرآباد میں شادی کے چند دن بعد دولھے کی گاڑی کو دلخراش حادثہ پیش آیا، جس کے باعث وہ اپنے سسر سمیت ہلاک ہو گیا۔
بھارتی میڈیا رپورٹس کے مطابق حیدرآباد کے علاقے محبوب نگر میں ایک دلخراش سڑک حادثے میں سب انسپکٹر اور ان کا داماد ہلاک جب کہ بیٹی زخمی ہو گئی، جس کی ایک ہفتہ قبل ہی شادی ہوئی تھی۔
پولیس حکام کے مطابق حادثہ بھوتپور منڈل کے قریب اس وقت پیش آیا جب برق رفتار کار بے قابو ہو کر سڑک کے کنارے درخت سے ٹکرا گئی، حادثے میں 57 سالہ سب انسپکٹر وینکٹ رمنا، ان کے داماد 25 سالہ پاون سائی اور ڈرائیور چندرا کی موت ہو گئی۔
پاون سائی اور انوشا کی شادی 15 فروری کو اننت پور میں دھوم دھام سے ہوئی تھی۔ حادثے میں سب انسپکٹر کی بیٹی انوشا زخمی ہو گئی، جنھیں علاج کے لیے اسپتال منتقل کیا گیا ہے، بتایا گیا کہ سب انسپکٹر ایک تقریب میں شرکت کے بعد اپنی بیٹی اور داماد کو حیدرآباد سے کار میں آبائی مقام ضلع نندیال لے جا رہے تھے کہ حادثہ پیش آ گیا۔
