بھارت میں شدید گرمی کی لہر سے شہری بلبلا اُٹھے، ہیٹ ویو کے باعث 85 افراد لقمہ اجل بن گئے۔
بین الاقوامی خبر رساں ادارے کی رپورٹ کے مطابق دارالحکومت دہلی میں رواں ہفتے ملک کا اب تک کا سب سے زیادہ درجہ حرارت 53 ڈگری ریکارڈ کیا گیا۔
بھارتی میڈیا کا کہنا ہے کہ گرمی کی شدید لہر سے اموات بہار، اتر پردیش اور اڑیسہ کی ریاستوں میں ہوئیں۔
نئی دہلی میں سخت گرمی کے دوران پانی کا بحران بھی سنگین ہوگیا، شہری پانی کی بوند بوند کو تر گئے، شمالی اور مشرقی ریاستیں ہیٹ ویو کی زد میں آگئی ہیں۔
مراد آباد میں بجلی کمپنیوں نے ٹرانسفارمروں کو ٹھنڈا رکھنے کے لئے اس پر پانی کا چھڑکاؤ شروع کردیا، ہیضے اور دیگر بیماریوں میں مبتلا ہو کر ہزاروں افراد اسپتالوں میں زیر علاج ہیں۔
راجستھان ہائی کورٹ نے حکومت کو قومی ایمرجنسی نافذ کرنے کی ہدایت کی ہے جبکہ تعلیمی اداروں کو 8 جون تک کے لئے بند کردیا گیا ہے۔
بھارتی محکمہ موسمیات کے مطابق ملک کے مختلف علاقوں میں مزید 2 روز تک ہیٹ ویو جاری رہنے کا امکان ہے جس دوران درجہ حرارت معمول سے 5 سے 6 ڈگری زیادہ رہ سکتا ہے۔
دنیا کے بیشتر ممالک میں شدید گرمی کی لہر، الرٹ جاری
واضح رہے کہ پاکستان، بھارت سمیت دنیا کے بیشتر ممالک ان دنوں ہیٹ ویو کی زد میں ہیں، جنوبی وسطی ایشیائی ریاستیں غیر معمولی موسمیاتی تبدیلیوں کی زد آچکی ہیں.
