نئی دہلی : بھارت میں پسند کی شادی نہ ہونے پر لڑکا اور لڑکی نے خود کشی کرلی، دونوں کی نعشیں کھیت سے ملنے پر گاؤں والوں نے پولیس کو اطلاع دی۔
تفصیلات کے مطابق بھارت کی ریاست تلنگانہ کے نلگنڈہ کے کاتے پلی منڈل کے گُڈی واڑہ گاؤں میں اجتماعی خود کشی کا واقعہ پیش آیا ہے جہاں کھیت سے ایک لڑکی اور لڑکے کی نعشیں ملیں ہیں۔
اس حوالے سے پولیس حکام کا کہنا ہے کہ لڑکے کی شناخت 26سالہ آر سرینواس اور لڑکی کی شناخت 16سالہ مہیشوری کے نام سے کی گئی ہے جو ایک دوسرے کے پڑوسی بتائے جاتے ہیں، دونوں کے رشتہ دار ان کی شادی کے خلاف تھے۔
پولیس کے مطابق سرینواس پہلے سے شادی شدہ ہے، گاؤں والوں نے دونوں کی لاشوں کو گاؤں میں واقع کھیت میں پایا، سرینواس کی پہلے ہی موت ہوگئی تھی اور ناگیشوری بے ہوشی کی حالت میں تھی جس کو علاج کے لئے اسپتال منتقل کیا گیا تاہم ڈاکٹر نے اس کو بھی مردہ قرار دے دیا۔
ابتدائی تفتیش کے مطابق مرنے والوں کے قریب سے کیڑے مار دوا کی ایک بوتل بھی ملی ہے، سرینواس کی دوستی ناگیشوری سے ہوگئی تھی تاہم ان دونوں کے رشتہ داروں نے اس کی مخالفت شروع کی تھی۔ اطلاع ملتے ہی پولیس وہاں پہنچی جس نے لاشوں کو پوسٹ مارٹم کے لئے بھیج دیا۔
