متھرا: بھارتی ریاست اترپردیش کے شہر متھرا میں مزدوروں کو لے جانے والی ایک گاڑی بجلی کے کھمبے سے ٹکرا گئی، حادثے میں 2 بچیاں اور 2 خواتین کچل کر ہلاک ہو گئیں۔
بھارتی میڈیا رپورٹس کے مطابق جمعرات کو متھرا میں شیر گڑھ روڈ پر ایک وین حادثے میں بہار سے تعلق رکھنے والے چار افراد کی موت جب کہ پانچ شدید زخمی ہو گئے ہیں، پک اپ وین اس وقت بجلی کے ایک کھمبے سے ٹکرائی جب وہ 25 مزدوروں کو لے کر علی گڑھ سے متھرا جا رہی تھی۔
صبح تقریباً 5 بجے ڈرائیور کو نیند آ گئی، جس کی وجہ سے گاڑی بے قابو ہو کر بجلی کے کجھمبے سے ٹکرائی، حادثے کے بعد گاڑی میں کرنٹ پھیلنے لگا، تو لوگوں میں افرا تفری مچ گئی اور وہ کود کود کر بھاگنے لگے، ایسے میں ڈرائیور نے گاڑی پیچھے کر دی، جس سے کئی لوگ اس کی زد میں آ کر کچلے گئے۔
مرنے والوں میں دو خواتین اور ان کی دو بیٹیاں شامل ہیں، بتایا گیا ہے کہ وین میں سوار مزدور بہار سے ٹرین کے ذریعے علی گڑھ پہنچے تھے اور پھر وہاں سے پک اپ میں بیٹھ کر متھرا میں واقع اینٹوں کے بھٹے پر پہنچائے جا رہے تھے۔