اسلام آباد : بھارت پڑوسی ممالک کوکھلم کھلا دھمکیاں دینے پر اتر آیا، بھارت کے مشیرقومی سلامتی اجیت دوول نے کہا بھارتی مفادات کے تحفظ کی لڑائی ملک سے باہر بھی لڑیں گے۔
تفصیلات کے مطابق چین کے ہاتھوں ہزیمت اٹھانے والے بھارت کی گیدڑ بھبکیاں جاری ہے ، بھارت نے دوبارہ خطےکاامن تباہ کرنے کیلئےدھمکیاں دینا شروع کر دیں۔
بھارت کےمشیرقومی سلامتی اجیت دوول نے نیا انڈیا کے عنوان سے نئے ڈاکٹرائن پر بڑھکیں مارتے ہوئے کہا بھارتی مفادات کے تحفظ کی لڑائی صرف اپنی زمین پر ہی نہیں لڑی جائے بلکہ ملک سے باہر بھی لڑیں گے اور یہ جنگ اس ملک میں لے جائیں گے، جہاں اس کیلئے خطرہ اٹھارہا ہو۔
اجیت دوول کا کہنا تھا کہ بھارت پہل نہ کرنے کے ماضی کے نظریئے میں تبدیلی کررہاہے، نیوانڈیا ڈاکٹرائن کےتحت جہاں سے خطرہ ہوگا وہاں میدان جنگ بنا دیں گے۔
تجزیہ کار اعجازاعوان کا کہنا ہے کہ بھارت چین اورپاکستان کے ساتھ کسی مس ایڈونچر کا سوچ بھی نہیں سکتا ، یہ پروپیگنڈا اپنی فوج کے گرتے ہوئے مورال کیلئے کرتا رہتا ہے۔
دوسری جانب بھارتی میڈیا کےمطابق اجیت دوول نے پڑوسی ممالک کو دھمکیوں کو نیوانڈیا بیانئے سے جوڑا ہے، بھارت سلامتی کولاحق خطرات سے نمٹنے کیلئے بھرپور فعال ہوسکتا ہے۔
