لاہور: بھارت نے پاکستان کارپٹ مینو فیکچرر اینڈ ایکسپورٹرز ایسوسی ایشن کی 37ویں عالمی نمائش کو سبوتاژ کرنے کیلئے اکتوبر میں کارپٹ کی نمائش کے انعقاد کا اعلان کر دیا، غیر ملکی مندوبین کی درخواست پر پاکستان میں منعقدہ تین روزہ نمائش کے انعقاد کی تاریخ تبدیل کر کے 26 ستمبر کی بجائے 15اکتوبر کر دی گئی ۔
تفصیلات کے مطابق کارپٹ مینو فیکچر ایسوسی ایشن نے نمائش کی تیاریوں کےلئے فنڈز کے جلد اجراءکا مطالبہ دہراتے ہوئے کہا ہے کہ ہمیں روایتی حریف بھارت کے اقدام کو چیلنج کے طور پر لینا ہوگا اورغیر ملکی خریداروں کو راغب کرنے کیلئے انہیں بہترین سہولیات کے حامل پیکج کی پیشکش کرنا نا گزیر ہے ۔
ایسوسی ایشن کے سینئر وائس چیئرمین اورکارپٹ کی عالمی نمائش کے چیف آرگنائزراعجاز الرحمان کی زیر صدارت اجلاس منعقد ہوا جس میں کارپٹ ٹریننگ انسٹی ٹیوٹ کے چیئر پرسن پرویز حنیف ،سینئر مرکزی رہنما عبد اللطیف ملک ، سینئر ممبر ریاض احمد ، سعید خان ، محمد اکبر ملک، میجر (ر) اختر نذیر سمیت دیگر شریک ہوئے ۔
اعجاز الرحمان نے کہا کہ بھارت کی جانب سے اکتوبر میں کارپٹ کی نمائش کا اعلان کر دیا گیا ہے جس کے بعد غیر ملکی خریداروں او رمندوبین کی درخواست پر پاکستان میں منعقدہ عالمی نمائش کی تاریخوں میں تبدیلی کر دی گئی ہے ۔اب یہ نمائش 26سے 28ستمبر کی بجائے 15سے17اکتوبر کولاہور کے مقامی ہوٹل میں منعقد ہو گی ۔
انہوں نے کہا کہ گزشتہ سال کی طرح امسال بھی بھارت نے ہماری نمائش کو سبوتاژ کرنے کی کوشش کی ہے لیکن ہم اسے چیلنج کے طور پر لیں گے ۔ ہماری کارپٹ مصنوعات معیار کے اعتبار سے پوری دنیا میں مانگ ہے اور امید ہے کہ امسال بھی بڑے پیمانے پر سودے ہوں گے۔
انہوں نے کہا کہ ٹریڈ ڈویلپمنٹ اتھارٹی پاکستان کی جانب سے تاحال نمائش کےلئے فنڈز کا اجراءنہیں کیا گیا ۔ہمیں غیر ملکیوں کو پاکستان آمد کےلئے بہترین سہولیات کے پیکیج کی پیشکش کرنا ہو گی تاکہ وہ پاکستان آنے کو ترجیح دیں ۔حکومت فوری طور پر فنڈز کا اجراءکرے تاکہ غیر ملکیوں سے رابطوں کو حتمی شکل دی جا سکے ۔
اعجاز الرحمان نے کہا کہ ایسے حالات میں جب ہمارا روایتی حریف بھارت سے مقابلہ ہے تو تمام اداروں کو کارپٹ ایسوسی ایشن کی سرپرستی کرنی چاہیے تاکہ ہماری مصنوعات کی موثر مارکیٹنگ ہو جس سے ہماری برآمدات کو بھی فروغ حاصل ہوگا ۔ اس موقع پر بھارت کے مقابلے میں نمائش کے حوالے سے مختلف تجاویز پر بھی غور کیا گیا ۔
