بریلی : اترپردیش کے شہر بریلی میں پولیس اہلکاروں کو ٹریننگ دینے والی ایک لڑکی نے ایک سپاہی کی محبت میں گرفتار ہوکر انتہائی خطرناک قدم اٹھالیا۔
بھارتی میڈیا کے مطابق سنبھل کے علاقے کی رہائشی23 سالہ لڑکی بریلی زون میں 112 پی آر وی پر تعینات پولیس اہلکاروں کو ڈیوائس آپریٹ کرنے کی ٹریننگ دیتی ہے۔
اس دوران مذکورہ لڑکی کا پیلی بھیت میں تعینات ایک سپاہی سے دوستی ہوئی جو بعد میں محبت میں بدل گئی۔ ذرائع کا کہنا ہے کہ گزشتہ ایک سال سے مسلسل سپاہی لڑکی کو شادی کا جھانسہ دے رہا تھا۔
لڑکی نے جب سپاہی سے شادی کرنے کی ضد کی تو اس نے صاف انکار کردیا، سپاہی کے انکار کے بعد لڑکی نے جراثیم کش دوا کھا کر خودکشی کی کوشش کی۔
لڑکی نے زہر کھانے کے بعد خود ہی پولیس کو فون کرکے اس کے اطلاع بھی دی جس پر فوری کارروائی کرتے ہوئے پولیس نے لڑکی کو ضلع اسپتال میں داخل کرایا، جہاں اس کی حالت سنگین بتائی جارہی ہے۔
بعد ازاں پولیس نے لڑکی کے اہل خانہ کو واقعہ کی اطلاع دی جس کے بعد اہل خانہ بھی ضلع اسپتال پہنچ گئے، زہر کھانے سے پہلے لڑکی نے سپاہی کے خلاف ایک نوٹ بھی لکھا تھا، نوٹ میں لڑکی نے لکھا کہ اس کی موت کا ذمہ دار سپاہی ہے۔
اس حوالے سے متعلقہ ایس ایس پی نے میڈیا کو بتایا کہ اس لڑکی نے زہر کھالیا ہے تاہم اب اس کی حالت خطرے سے باہر ہے۔ ایس ایس پی کا یہ بھی کہنا ہے کہ لڑکی کی کس سپاہی سے دوستی تھی؟ اس کا پتہ لگایا جارہا ہے۔ اس کے بعد ہی مزید قانونی کارروائی کی جائے گی۔
