کولکتہ : بھارتی شہر کوکلتہ میں پولیس نے خاتون کو ہراساں کرنے والا آن لائن ٹیکسی ڈرائیور گرفتار کر لیا۔
تفصیلات کے مطابق بھارتی شہر کولکتہ میں پولیس نے آن لائن ٹیکسی ڈرائیور کو مبینہ طور پر خاتون مسافر کو ہراساں کرنے اور اس کی تصاویر لینے کے الزام میں گرفتار کر لیا۔
پولیس حکام کے مطابق متاثرہ خاتون نے ٹیکسی ڈرائیور کے خلاف گرفا پولیس اسٹیشن میں شکایت درج کرائی ہے جس میں کہا گیا ہے کہ اتوار کی رات ساڑھے گیارہ بجے میں نے بہالہ سے گرفا جانے کے لیے آن لائن ٹیکسی بک کرائی۔
خاتون کے مطابق سفر کے دوران کار میں اے سی آن کرنے پر ڈرائیور سے بحث ہوئی جس کے بعد ڈرائیور نے نہ صرف مجھے ہراساں کیا بلکہ میری تصاویر بھی بنائیں۔
پولیس عہدیدار نے بتایا کہ جب ٹیکسی جیانند سیٹھی کے قریب پہنچی تو اس خاتون نے پولیس سے رابطہ کیا۔ پولیس نے خاتون اور ڈرائیور کو گرفا اسٹیشن منتقل کیا جہاں خاتون کی شکایت پر ٹیکسی ڈرائیور کو باضابطہ طور پر گرفتار کر لیا گیا۔
یاد رہے کہ گزشتہ سال نومبر میں بھارتی ریاست حیدرآباد میں 22 سالہ خاتون ڈاکٹر پریانکا ریڈئی کی جلی ہوئی لاش برآمد ہوئی تھی جسے ریپ کے بعد قتل کر دیا گیا تھا۔
