کرناٹک: بھارتی ریاست کرناٹک میں اسکول طالبہ پر لگنے والے چوری کے الزام نے اس کی جان لے لی۔
بھارتی میڈیا رپورٹس کے مطابق ریاست کرناٹک میں اسکول کی 14 سالہ طالبہ پر ٹیچر نے 2 ہزار روپے چوری کرنے کا الزام لگا دیا تھا، جس پر دل برداشتہ ہو کر اس نے خود کشی کر لی۔
آٹھویں جماعت کی طالبہ کے اہل خانہ نے پولیس کو شکایت درج کرائی ہے کہ لڑکی کو اس کے اسکول میں ہونے والے واقعات نے اس افسوس ناک حرکت پر مجبور کیا۔
باگل کوٹ کے گورنمنٹ ہائی اسکول میں ٹیچر جے شری مشری کوٹی اور ہیڈ ماسٹر کے ایچ مجاور نے آٹھویں جماعت کی طالبہ پر دو ہزار روپے چوری کا الزام لگایا اور ساتھ ہی یہ بھی کہا کہ اگر وہ اس میں ملوث ہوئی تو اسے اسکول سے نکال دیا جائے گا۔
رپورٹس کے مطابق اسکول میں لڑکی کی تلاشی بھی لی گئی تھی، لیکن پولیس نے کہا ہے کہ ابھی تک اس کے ثبوت نہیں ملے ہیں، پولیس نے بتایا کہ لڑکی کی لاش 16 مارچ کو ملی جب کہ لڑکی خود 15 مارچ سے گھر سے غائب تھی۔ کرناٹک پولیس اس کیس کے سلسلے میں مزید تفتیش کر رہی ہے۔
