لیڈز: آئی سی سی ورلڈکپ 2019 میں مقابلوں کا سلسلہ جاری ہے، آج دو میچز کھیلے جائیں گے، پہلے میچ میں سری لنکا اور بھارت جبکہ دوسرے میچ میں آسٹریلیا اور جنوبی افریقہ کی ٹیمیں آمنے سامنے ہوں گی۔
تفصیلات کے مطابق آئی سی سی ورلڈکپ کے 44 ویں میچ میں آج سری لنکا اور بھارت کی ٹیمیں آمنے سامنے ہوں گی، میچ پاکستانی وقت کے مطابق دوپہرڈھائی بجے شروع ہوگا۔
دوسری جانب میگا ایونٹ کے 45 ویں میچ آسٹریلیا اور جنوبی افریقا کی ٹیمیں شام ساڑھے پانچ بجے اولڈ ٹریفورڈ میں مدمقابل ہوں گی۔ آسٹریلیا اور بھارت دونوں ٹیمیں ہی ورلڈکپ کے سیمی فائنل کے لیے کوالیفائی کرچکی ہیں۔
پوائنٹس اسکورننگ ٹیبل پر 8 میچز میں سے 7 میں کامیابی حاصل کرنے کے بعد آسٹریلیا پہلی پوزیشن پر براجمان ہے جبکہ بھارت 8 میں سے 6 میچز جیت کر ٹیبل پر دوسری پوزیشن پر موجود ہے۔
واضح رہے کہ نیوزی لینڈ اور انگلینڈ کی ٹیمیں اپنے تمام 9 میچز کھیل چکی ہیں لیکن آسٹریلیا اور بھارت کی ٹیمیوں کا ایک، ایک میچ باقی ہے جو آج کھیلا جائے گا۔
بھارت کی ٹیم سری لنکا کو میچ میں ہرا دیتی ہے تو اس کے پوائنٹس کی تعداد 15 ہوجائے گی اور وہ پہلی پوزیشن پر آجائے گی اس کے بعد سیمی فائنل میچوں کا فیصلہ آسٹریلیا اور جنوبی افریقا کے خلاف میچ کے نتیجے پر ہوگا۔
