ممبئی : بھارت کے لیجنڈ کرکٹر والٹر ڈیسوزا گزشتہ روز جہان فانی سے کوچ کرگئے، ان کی عمر93سال تھی، وہ رات کو سوئے اور اسی حالت میں دنیا کو الوداع کہہ گئے۔
تفصیلات کے مطابق کرکٹ کے میدان میں زندگی کے20 سال گزارنے والے بھارت کے لیجنڈ کرکٹر والٹر ڈیسوزا گزشتہ روز چل بسے، والٹر ڈیسوزا نے ممبئی کے علاقے کھار میں واقع اپنی رہائش گاہ پر آخری سانس لی، ڈیسوزا کے انتقال سے پوری کھیل دنیا صدمے میں ہے۔
خیال رہے کہ ڈیسوزا سب سے عمر دراز فرسٹ کلاس کرکٹر تھے، انہوں نے گجرات اور اے سی سی کے لئے کھیلا ہے اور اندور میں ہولکر ٹیم کے خلاف گجرات کے لئے 1950-51 میں رنجی ٹرافی کا فائنل کھیلا تھا۔
جس میں انہوں نے 50 اور 77 رن بنائے تھے، والٹر ڈیسوزا کا فرسٹ کلاس کیریئر تقریبا 20 سال کا رہا۔ انہوں نے1947 سے 1966 تک کرکٹ کو اپنا وقت دیا۔
اس لیجنڈ کرکٹر نے گجرات کی جانب سے 16 میچ کھیلے ہیں۔ 27 اننگز میں انہوں نے 35.69 کی اوسط سے 821 رن بنائے ہیں۔
اس حوالے سے گجرات ٹیم کے سابق کوچ وجے پٹیل والٹر ڈیسوزا کے ساتھ گزارے ہوئے اچھے لمحات کو یاد کرتے ہوئے آبدیدہ ہوگئے،
میڈیا سے گفتگو کرتے ہوئے انہوں نے کہا کہ انہوں نے2017 میں بریبان اسٹیڈیم کا دورہ کیا تھا، جہاں ایرانی کپ کا ایک میچ کھیلا جانا تھا۔
وجے نے بتایا کہ اس سال گجرات کے رنجی ٹرافی جیتنے کے بعد ہم نے انہیں ایرانی کپ کے لئے مدعو کیا تھا، اس وقت وہ 90 سال کے تھے، وہ اس وقت آئے اور کھلاڑیوں سے بات چیت بھی کی، وہ کافی یادگار دوپہر تھی۔
