ممبئی: مشہور اداکارہ نندا نے فلم اداکارہ بننے کے بجائے فوج میں جانا چاہتی تھیں لیکن فلم انڈسٹری میں اداکارہ بنیں اور شائقین کا دل جیتا ہے۔
مشہور اداکارہ نندا نے اپنی دلکش اداؤں سے تقریباً تین دہائی تک شائقین کا دل جیتا ہے لیکن بہت کم لوگ یہ بات جانتے ہوں گے کہ وہ فلم اداکارہ بننے کے بجائے فوج میں جانا چاہتی تھیں۔
8 جنوری 1939 کو نندا کی پیدائش ممبئی میں ہوئی، اداکارہ کی فیملی کا تعلق پہلے ہی انڈسٹری سے تھا، ان کے والد ماسٹر ونایک مراٹھی تھیٹر کے مشہور مزاحیہ اداکار تھے۔
اس کے علاوہ ماسٹر ونایک نے کئی فلمیں بھی بنائیں تھیں، ان کے والد چاہتے تھے کہ نندا فلم انڈسٹری میں اداکارہ بنیں لیکن اس کے باوجود نندا کی دلچسپی اداکاری کی طرف نہیں تھی۔
بھارتی میڈیا نے ایک روپورٹ میں بتایا ہے کہ آنجہانی نندا عظیم مجاہد آزادی سبھاش چندر بوس سے بے حد متاثر تھیں اور ان کی ہی طرح فوج میں جاکر ملک کی حفاظت کرنا چاہتی تھیں۔
ایک دن کا واقعہ ہے کہ جب نندا پڑھائی میں مصروف تھیں تب ان کی والدہ نے ان کے پاس آکر کہا تمہیں اپنے بال کٹوانے ہوں گے، کیونکہ تمہارے پاپا چاہتے ہیں کہ تم ان کی فلم میں لڑکے کا رول ادا کرو۔
ماں کی یہ بات سن کر نندا کو بہت غصہ آیا، پہلے تو انہوں نے بال کٹوانے کےلئے صاف منع کر دیا لیکن ماں کے سمجھانے پر وہ اس بات کےلئے تیار ہو گئیں، اس فلم کے بننے کے دوران نندا کے سر سے باپ کا سایہ اٹھ گیا اور وہ فلم بھی ادھوری رہ گئی۔
نندا کے والد کے انتقال کے بعد ان کی معاشی حالت خراب ہونے لگی، صورتحال اتنی ابتر ہوگئی کہ گھر اور کار تک بیچنے کی نوبت آگئی، خاندان کی معاشی حالت خراب ہونے کی وجہ سے نندا نے اپنے بچپن میں ہی فلموں میں کام کرنا شروع کردیا۔
فلم ’چھوٹی بہن‘ کی کامیابی کے بعد نندا کو کئی اچھی فلموں کی پیش کش آنا شروع ہوگئیں، دیو آنند کی فلم کالا بازار اور ہم دونوں، بی آر چوپڑا کی فلم قانون قابل ذکر ہیں۔
1965 نندا کے کیریئر کا اہم سال ثابت ہوا، اس سال ان کی فلم ’جب جب پھول کھلے‘ ریلیز ہوئی، بہترین موسیقی، نغموں اور اداکاری سے آراستہ اس فلم کی زبردست کامیابی نے نہ صرف اداکار ششی کپور اور نغمہ نگار آنند بکشی اور موسیقار کلیان جی آنند جی کو شہرت کی بلندیوں پر پہنچایا ساتھ ہی نندا کو بھی ایک بہترین اداکارہ کے طورپر کامیابی دلائی۔
1965 میں اداکارہ کی ایک اور سپر ہٹ فلم ’ گم نام‘ ریلیز ہوئی اس فلم میں وہ مشہور اداکار منوج کمار کے ساتھ نظر آئیں، 1969 میں ان کی فلم ’اتفاق‘ ریلیز ہوئی، اس فلم میں راجیش کھنہ کے ساتھ ان کی جوڑی کو کافی پسند کیاگیا اور یہ فلم بھی سپرہٹ رہی۔
1992 میں نندا نے فلم ساز اور ہدایت کار من موہن دیسائی کے ساتھ شادی کرلی لیکن 1994 میں ان کے شوہر کی موت سے نندا کو گہرا صدمہ پہنچا جس کے بعد 25 مارچ 2014 کو نندا نے اس دنیا کو الواع کہہ دیا۔
