ممبئی: موت کا کوئی وقت متعین نہیں ہے، بھارتی ٹی وی اینکر سڑک سے گزر رہی تھیں کہ ناریل کا درخت اُن کے سرپر آگرا جس سے وہ ہلاک ہوگئیں، واقعے کی ویڈیو منظر عام پر آگئی۔
بھارتی میڈیا کے مطابق 58 سالہ کنچن ناتھ یوگا کی کلاس لینے کے بعد پیدل گھر جارہی تھیں کہ سڑک کے عین بیچ و بیچ اُن پر ناریل کے درخت کا ایک بڑا تنا گر گیا۔
پڑھیں: اپنے ہی شوہر کی موت، خاتون نیوز اینکر نے ضبط کی انتہاء کردی
درخت کا بڑا حصہ خاتون کے سرپر زور سے لگا جس کے بعد وہ اس کے نیچے دب گئیں، قریب میں موجود لوگوں نے فوری طور پر خاتون کو بچانے کی کوشش کی اور انہیں نکال کرقریبی اسپتال منتقل کیا۔
اسپتال پہنچنے پر معلوم ہوا کہ کانچن کے سر پر گہری چوٹیں آئیں ہیں جس کی وجہ سے وہ بے ہوش ہیں اور اُن کی جان خطرے میں ہے، ڈاکٹرز نے خاتون کی حالت دیکھتے ہوئے انہیں انتہائی نگہداشت وارڈ میں داخل کیا مگر وہ زخموں کی تاب نہ لاتے ہوئے دم توڑ گئیں۔
ویڈیو دیکھیں
جائے حادثہ پر لگے سی سی ٹی وی کیمرے میں خاتون کی موت کا منظر عکس بند ہوگیا جس کی ویڈیو ریلیز کردی گئی ہے، کانچن کی اچانک موت پر اُن کے خاندان اور مداح شدید صدمے سے دوچار ہیں۔
