پاکستان کرکٹ بورڈ (پی سی بی) نے لاہور میں بھارت کا ترانہ بجانے پر آئی سی سی سے وضاحت طلب کرلی۔
اے آر وائی نیوز کے مطابق آئی سی سی چیمپئنز ٹرافی میں انگلینڈ اور آسٹریلیا کے میچ میں بھارت کا ترانہ بجایا گیا جس پر پی سی بی نے انٹرنیشن کرکٹ کونسل سے وضاحت طلب کی ہے۔
پی سی بی ذرائع کا کہنا ہے کہ لاہور میں بھارت کا ترانہ بجنا آئی سی سی کی غلطی ہے، آئی سی سی نے 8 ملکوں کے ترانے رکھے تھے۔
ذرائع کا کہنا ہے کہ بھارت کی ٹیم پاکستان نہیں آئی ان کا ترانہ بجانا آئی سی سی کی غلطی ہے، پی سی بی کو آئی سی سی کی وضاحت کا انتظار ہے۔
واضح رہے کہ گزشتہ روز پاکستان کرکٹ بورڈ میچ میں پاکستان کا نام براڈکاسٹ نہ کیےجانے پر کرکٹ کے عالمی نگراں ادارے آئی سی سی کو خط لکھ دیا ہے۔
آئی سی سی میچ کےدوران لوگو میں پاکستان کا نام نہ ہونے پر غلطی تسلیم کر چکی ہے۔ آئی سی سی نے پی سی بی کو غیررسمی طور پر بتایا گرافکس میں غلطی تکنیکی وجہ سے ہوئی۔
آئی سی سی ترجمان نے مزید بتایا میچ کے دوران لوگو تبدیل کرنا ممکن نہیں تھا۔
ذرائع کے مطابق پی سی بی انٹرنیشنل کرکٹ کونسل کی جانب سے ملنے والے جواب پر مطمئن نہیں ہے اور اس معاملے پر آئی سی سی کو باضابطہ خط لکھ دیا ہے۔
آئی سی سی ایونٹ میں لائیو میچ کے دوران لوگو میں میزبان کا نام ہمیشہ لکھا ہوتا ہے۔ پاکستان کرکٹ بورڈ نے خط میں آئی سی سی سے معاملے پر وضاحت مانگی ہے۔
پی سی بی نے آئی سی سی سے ایسا دوبارہ نہ ہونے کی یقین دہانی بھی مانگی ہے۔
