پاکستان کے معروف ٹینس پلیئر اعصام الحق نے کہا ہے کہ پاکستان پُرامن ملک ہے آئی سی سی چیمپئنز ٹرافی میں شرکت کے لیے بھارتی ٹیم کو پاکستان آنا چاہیے۔
ٹینس اسٹار کا اپنے بیان میں بھارتی حکومت کو مخاطب کرتے ہوئے کہنا تھا کہ بھارت ڈیوس کپ کی ٹیمیں پاکستان بھیجتا ہے اس کے ساتھ پڑوسی ملک کو چاہیے کہ وہ اپنی کرکٹ ٹیم بھی پاکستان بھیجے۔
اعصام نے کہا کہ سیکیورٹی فورسز کی کاوشں کے سبب ملک میں امن ہے۔ اگر پاکستان کھیلوں کی ٹیمیں بھارت بھیج سکتا ہے تو پھر بھارتی ٹیموں کو بھی پاکستان آنے میں کوئی مسئلہ نہیں ہونا چاہیے۔
عالمی سطح پر ٹینس کے معروف پلیئر نے کہا کہ انٹرنیشنل ٹینس فیڈریشن نے ڈیوس کپ سے متعلق میرٹ پر فیصلہ کیا ہے۔
انھوں نے کہا کہ ڈیوس کپ کھیلنے کے لیے بھارت کے پاس پاکستان نہ آنے کی کوئی وجہ نہیں ہے، بھارتی حکومت کا انڈین ٹینس ٹیم پر کوئی دباؤ ہوگا۔
اعصام نے کہا کہ بھارت اپنی ٹیمیں پاکستان نہ بھیج کر بڑی غلطی کریگا۔ ڈیوس کپ ٹائی میں شرکت کے لیے بھارتی پلیئرز کو لازمی پاکستان آنا چاہیے، یہاں کھیلوں سے محبت کرنے والے لوگ بستے ہیں۔
