ابوظہبی : دبئی کے عالمی ہوائی اڈے پر لاٹری کا ٹکٹ خریدنے والے 45 سالہ بھارتی شہری نے 36 لاکھ اماراتی درہم (13 کروڑ سے زائد پاکستانی روپے) انعام میں جیت لیے۔
تفصیلات کے مطابق روزگار کے لیے متحدہ عرب امارات میں مقیم بھارتی شہری نے دبئی انٹرنیشنل ایئر پورٹ کے ڈیوٹی فری لکی ڈرا سے پہلی مرتبہ خریدی گئی لاٹری سے ہی دس لاکھ امریکی ڈالر کی انعامی رقم جیت کر اپنے نام کرلی۔
اماراتی خبر رساں ادارے کا کہنا تھا کہ گذشتہ 6 برس سے اماراتی ریاست دبئی میں ملازمت کرنے والے ’45 سالہ سورو دے‘ نے گذشتہ روز ملینیم ملینئر کمپنی کا جیکٹ پوٹ انعام جیتا ہے۔
مقامی میڈیا کا کہنا تھا کہ بھارتی شہری گذشتہ 6 برسوں سے دبئی کی انشورنس کمپنی میں ڈپارٹمنٹ ہیڈ کی حیثیت سے خدمات انجام دے رہا ہے، جب انہیں لاٹری کے متعلق بتایا گیا تو ان کی خوشی دیدنی تھی۔
بھارتی شہری کا کہنا تھا کہ ’میں دبئی ڈیوٹی فری لاٹری کمپنی کا بے حد شکر گزار ہوں، جس نے میرے اہل خانہ کو لمبے عرصے کے لیے خزانہ دے دیا‘۔
اماراتی میڈیا کے مطابق دبئی میں لاٹری جیتنے والا تاجر نعمان عارف پشاور کے رہائشی ہیں جنہوں نے پہلی مرتبہ اپنی قسمت آزمانے کے لیے دبئی کے مشہور لکی ڈرا کا آن لائن ٹکٹ خریدا تھا تاہم ایک ہی دفاع میں قسمت کی دیوی نے ان پر نظر کرم کرلی جس کے باعث تاجر نے دس لاکھ امریکی ڈالر جیتے تھے۔
