نئی دہلی: بھارتی برآمدات نے 750 بلین ڈالر کا ہندسہ عبور کر لیا، وزیر تجارت پیوش گوئل نے بتایا کہ بھارتی برآمدات 760 بلین ڈالر سے تجاوز کر جائیں گی۔
بھارتی میڈیا کے مطابق گزشتہ روز بھارتی وزیر تجارت و صںعت پیوش گوئل نے ایک تقریب سے خطاب کرتے ہوئے کہا کہ مالی سال 2022-23 کے اختتام تک ملک کی اشیا و خدمات کی برآمدات 760 بلین ڈالر سے تجاوز کر سکتی ہے۔
انھوں نے کہا ’’مالی سال 2021-22 میں ملک کی کل برآمدات 676 ارب ڈالر تھیں، جب کہ ایک برس قبل یہ تعداد 500 ارب ڈالر تھی، عالمی تجارت میں بھارت کی کارکردگی نے ناقدین کو غلط ثابت کر دیا ہے۔‘‘
بھارتی وزارت تجارت کے مطابق اپریل سے فروری کے دوران تجارتی سامان کی برآمدات 7.5 فی صد بڑھ کر 405.94 بلین ڈالر تک پہنچ گئیں، زیر جائزہ مدت کے دوران خدمات کی برآمدات 30.4 فی صد بڑھ کر 296.94 بلین ڈالر تک پہنچ گئیں۔
چائے کی درآمد کم ہو گئی
پیوش گوئل نے کہا کہ ایک ایسے وقت میں جب دنیا کساد بازاری، بلند افراط زر اور بلند شرح سود کا سامنا کر رہی ہے، بھارتی معیشت اچھی جا رہی ہے۔
