نئی دہلی: بھارتی وزارت خارجہ نے پاکستانی ایئر فورس کے ہاتھوں اپنا طیارہ تباہ ہونے اور فوجی تنصیبات کو نشانہ بنانے کا اعتراف کرلیا۔

تفصیلات کے مطابق بھارتی وزارت خارجہ کے ترجمان رویش کمار نے انتہائی مختصر پریس کانفرنس کی ، پاکستان کی فاتحانہ کارروائیوں کا اعتراف کیا اور بغیر سوال و جواب کے روانہ ہوگئے۔

رویش کمار نے اعتراف کیا کہ پاکستان نے ایئر فورس نے ان کی تین ملٹری تنصیبات کو نشانہ بنایا ہے۔ انہوں نے تصدیق کی کہ ان کا ایک مگ 21 طیارہ تباہ ہوچکا ہے۔

انہوں نے کہا کہ پاکستان اور بھارتی فضائیہ کا ٹکراؤ  ہوا جس میں  ان کا مگ 21 طیارہ گر کر تباہ ہوگیا۔ پائلٹ کے بارے میں انہوں نے کہا کہ وہ لاپتہ ہے، اور اس کے پاکستانی تحویل میں ہونے کی اطلاعات کی تصدیق کی جارہی ہے۔

یاد ر ہے کہ آج صبح  پاکستانی ایئر فور س نے بھارتی فضائیہ کے دو طیارے مار گرائے تھے ۔ ان میں سے ایک مقبوضہ کشمیر میں گرا جبکہ ایک پاکستان کی جانب آزاد کشمیر میں گرا۔ پاکستانی جانب گرنےو الے جہاز کے دونوں پائلٹ حراست میں لے لیے گئے ہیں۔

بھارت جان لے، جنگ مسلط کی تو بھرپور جواب دینے کی صلاحیت رکھتےہیں

پاک فوج  نے بھارتی پائلٹ کو میڈیا کے سامنے پیش کردیا

ڈی جی آئی ایس پی آر جنرل آصف غفور نے اپنی پریس کانفرنس میں  بھارت کے ایک پائلٹ کی ویڈیو پیش کی جس میں وہ اپنا نام ابھینندن بتا رہا ہےاور ساتھ ہی ساتھ اپنا عہدہ اور سروس نمبر بھی بتارہا ہے۔

دوسرے پائلٹ کے بارے میں پاک فوج کے ترجمان نے بتایا کہ وہ زخمی ہے اور اس کا سی ایم ایچ میں علاج کیا جاچکا ہے۔ انہوں نے یہ بھی کہا کہ بھارتی پائلٹس کے ساتھ بالکل ویسا ہی سلوک کیا جارہا ہے جیسا کہ کوئی مہذب قوم کرسکتی ہے۔

آج صبح کے واقعے کے تناظر میں بھارتی میڈیا کی جانب سے دعویٰ کیا جارہا تھا کہ ان کی ایئر فورس نے   پاکستانی ایف 16 کو نشانہ بنایا ہے۔ میجر جنرل آصف غفور نے اس بات کی نفی کی تھی اور بھارتی ترجمان نے بھی اپنی پریس بریفنگ میں اس نوعیت کا کوئی دعویٰ نہیں کیا۔