ابوظبی: متحدہ عرب امارات کے شہر ابوظبی میں بھارتی شہری لاپتا ہوگیا، بھائی نے پولیس میں رپورٹ درج کرادی۔
عرب میڈیا کے مطابق ابوظبی میں بھارتی شہری 27 سالہ حارث لاپتا ہوگیا، رپورٹ کے مطابق حارث اس وقت لاپتا ہوا جب وہ کیرالا واپس جانے کی تیاریوں میں مصروف تھا۔
حارث کے بھائی سہیل کے مطابق 8 ستمبر کو بھائی سے الشمخ کے علاقے میں ملاقات ہوئی تھی، لاپتا بھارتی شہری ایک سال سے ایک ریسٹورنٹ میں بطور ڈرائیور نوکری کرتا تھا۔
سہیل کے مطابق بھائی کے لاپتا ہونے کی شکایات درج کرادی ہے اور سوشل میڈیا پر بھی صارفین سے تلاش کے حوالے سے مدد طلب کرلی۔
مزید پڑھیں: بھارت میں لاپتہ ہونے والی دبئی کی شہزادی بازیاب
سہیل کا کہنا تھا کہ ہم بھائی کی تلاش کے لیے ہر ممکن کوشش کررہے ہیں، والدہ کو جب سے حارث کے لاپتا ہونے علم ہوا ہے انہوں نے کھانا پینا چھوڑ دیا ہے اور بہت پریشان ہیں۔
بھارتی شہری کے والد کا 6 ماہ قبل انتقال ہوا ہے جبکہ حارث 11 بہن بھائیوں میں سب سے بڑا ہے اور والد کے انتقال کے بعد گھر کی ذمہ داری اس کے کاندھوں پر ہے۔
سہیل کا کہنا تھا کہ گزشتہ روز بھارتی سفارت خانے میں بھی شکایت درج کرانے گیا تھا، انہوں نے بھائی کی تلاش میں ہر ممکن مدد فراہم کرنے کی یقین دہانی کرائی ہے۔
انہوں نے کہا کہ امید ہے بھائی جہاں بھی ہوگا خیریت سے ہوگا۔