The news is by your side.

بھارت : کانگریس کے مرکزی رہنما نے نئی جماعت بنانے کا اعلان کردیا

نئی دہلی : بھارتی اپوزیشن جماعت کانگریس سے مستعفی ہونے والے سینئر سیاستدان اور جموں و کشمیر کے سابق وزیر اعلیٰ غلام نبی آزاد نے نئی جماعت بنانے کا اعلان کردیا۔

آزاد نے گزشتہ روز کانگریس کی بنیادی رکنیت سے استعفیٰ دیکر سیاسی حلقوں میں سنسنی پھیلادی۔ کانگریس کی قومی صدر سونیا گاندھی کے نام ایک مکتوب میں انہوں نے اپنے استعفی کی وجوہات بیان کیں جس میں انہوں نے کہا کہ راہل گاندھی کی قیادت طفلانہ اور غیر سنجیدہ رہی ہے۔

ان کا کہنا تھا کہ کانگریس ان کی قیادت میں 2014 سے دو لوک سبھا انتخابات ہار چکی ہے۔ کانگریس نے آزاد کے استعفی کو ان کی خودغرضی اور موقع پرستی سے تعبیر کیا ہے۔

پانچ دہائیوں تک کانگریس کے ساتھ جڑے رہنے والے سینئر سیاستدان اور جموں و کشمیر کے سابق وزیر اعلیٰ غلام نبی آزاد جموں میں ایک عوامی جلسے میں اپنی نئی پارٹی کا اعلان کریں گے۔

ذرائع کے مطابق وہ 4 ستمبر کو جموں پہنچیں گے اور اگلے روز شہر میں ایک بڑی ریلی کا اہتمام کیا جائے گا جس میں وہ اپنی پارٹی کا اعلان کریں گے۔

آزاد نے گزشتہ روز کانگریس کی بنیادی رکنیت سے استعفیٰ دیکر سیاسی حلقوں میں سنسنی پھیلادی۔آزاد کے استعفی کے فوراً بعد جموں و کشمیر سے کئی سینئر کانگریس لیڈروں نے بھی اپنے استعفی پارٹی صدر کو روانہ کئے۔

Thumbnail image

حال ہی میں نامزد کئے گئے جموں و کشمیر کے کانگریس صدر وقار رسول وانی نے آزاد کے استعفی پر تبصرہ کرتے ہوئے کہا کہ اس سے ملک کے سب سے پرانی پارٹی پر کوئی اثر نہیں پڑے گا۔

انہوں نے کہا کہ دو روز قبل ہی وہ آزاد سے ملے تھے لیکن انہوں نے ایسا کوئی اشارہ نہیں دیا کہ وہ پارٹی سے الگ ہورہے ہیں۔

دریں اثناء معلوم ہوا ہے کہ کانگریس کے کئی سینئر رہنما آج جموں سے دہلی روانہ ہوئے ہیں جہاں وہ مرکزی قیادت کے ساتھ بات چیت کریں گے۔

دہلی روانہ ہونے والے لیڈروں میں وقار رسول وانی اور رمن بھلہ شامل ہیں۔ معلوم ہوا ہے کہ یہ لیڈران پارٹی لیڈروں سے ملنے کے بعد دلی میں ایک پریس کانفرنس سے بھی خطاب کریں گے۔

Comments

یہ بھی پڑھیں