نئی دہلی: بھارتی بحریہ کا کہنا ہے کہ اسے 10 روز قبل بحیرہ عرب کے اوپر حادثے کا شکار ہوئے مگ 29 کے لڑاکا طیارہ کے ملبے کے قریب انسانی باقیات ملے ہیں جنہیں ڈی این اے کے لیے بھیجا گیا ہے۔
بھارتی میڈیا کے مطابق بحریہ کا مگ 29 کا ٹرینی طیارہ 26 نومبر کو بحیرہ عرب میں گوا کے نزدیک حادثے کا شکار ہوگیا تھا، طیارے میں سوار ایک پائلٹ کو بحفاظت بچا لیا گیا تھا۔
طیارے میں سوار دوسرا پائلٹ کمانڈر نشانت حادثے کے بعد لاپتہ تھا، بحریہ نے اسی روز اس کا پتہ لگانے کے لیے تلاش مہم کا آغاز کیا تھا۔
بھارتی بحریہ کے مطابق 11 روز کی مستقل مہم کے بعد آخر کار آج بحیرہ عرب میں گوا سے 30 سمندری میل کے فاصلے پر بحیرہ میں تقریباً 70 میٹر نیچے طیارے کے ملبے کے پاس ایک انسانی جسم کی باقیات پائی گئی ہیں جنہیں ڈی این اے کے لیے بھیجا گیا ہے۔
ڈی این اے ٹیسٹ سے حادثے میں لاپتہ پائلٹ کی شناخت کی جا سکے گی۔
بھارتی بحریہ نے پائلٹ کی تلاش کے لیے وسیع مہم کا آغاز کیا تھا، اس میں جنگی جہازوں، آبدوزوں، ہیلی کاپٹروں اور جاسوسی طیاروں کی مدد لی گئی تھی۔
اس دوران بحریہ کے غوطہ خوروں نے بھی تلاش کا کام جاری رکھا، طیاروں اور ہیلی کاپٹروں نے تلاشی مہم کے دوران 270 گھنٹے سے زائد وقت تک اڑان بھری۔
