نئی دہلی: معروف بھارتی ٹی وی اینکر سائبر جعلسازی کا شکار ہوگئیں، ہارورڈ یونیورسٹی کی جانب سے موصول ملازمت کی پیشکش پر انہوں نے بھارت میں اپنی ملازمت کو خیر باد کہہ دیا تاہم بعد ازاں یہ پیشکش جعلسازی نکلی۔

بھارتی میڈیا کے مطابق این ڈی ٹی وی کی نیوز اینکر ندھی رازدان کے ساتھ سائبر جعلسازی کا واقعہ پیش آیا، ندھی کو کچھ ماہ قبل دنیا کی معروف امریکی درسگاہ ہارورڈ یونیورسٹی سے ایک ای میل موصول ہوئی جس میں انہیں یونیورسٹی میں ایسوسی ایٹ پروفیسر آف جرنلزم بننے کی پیشکش ہوئی۔

ندھی نے وہ پیشکش قبول کرتے ہوئے این ڈی ٹی وی کے ساتھ اپنی 21 سالہ ملازمت کو خیر باد کہا اور ہارورڈ جانے کی تیاریاں کرنے لگیں، لیکن اب انہیں معلوم ہوا کہ یہ ای میل فراڈ پر مبنی تھی۔

I have been the victim of a very serious phishing attack. I’m putting this statement out to set the record straight about what I’ve been through. I will not be addressing this issue any further on social media. pic.twitter.com/bttnnlLjuh

— Nidhi Razdan (@Nidhi) January 15, 2021

سماجی رابطے کی ویب سائٹ ٹویٹر پر پوسٹ کرتے ہوئے انہوں نے کہا کہ وہ گزشتہ کچھ ہفتے سے اس حوالے سے متعدد اداروں اور افراد سے رابطے میں ہیں۔

ندھی کا کہنا ہے کہ جعلسازوں نے ان کے ڈیٹا تک بھی رسائی حاصل کرلی ہے۔

اینکر کا کہنا ہے کہ انہوں نے تمام ثبوت پولیس کو فراہم کردیے ہیں جو اس معاملے کی تحقیقات کر رہی ہے، علاوہ ازیں ہارورڈ یونیورسٹی کی انتظامیہ کو بھی تمام معاملے سے آگاہ کیا جاچکا ہے۔