لندن میں بھارت سے تعلق رکھنے والی 66 سالہ خاتون کو 22 سالہ ملزم نے گردن میں چاقو گھونپ کر موت کے گھاٹ اتار دیا۔
میڈیا رپورٹس کے مطابق مقتولہ کی شناخت انیتا مکھے کے نام سے ہوئی جو نیشنل ہیلتھ سروس (این ایچ ایس) میں میڈیکل سیکرٹری کے طور پر پارٹ ٹائم کام کرتی تھی۔
9 مئی کو لندن کے علاقے ایج ویئر میں بس اسٹاپ پر انیتا مکھے کو ملزم نے گردن میں چاقو گھونپ دیا جس سے خون کا فوراہ پھوٹ پڑا اور وہ زمین پر گر گئیں۔
ترجمان پولیس نے بتایا کہ خاتون کو چاقو گھونپنے کی اطلاع پولیس کو 9 مئی کے دن تقریباً 11:50 بجے دی گئی تھی جس کے فوراً بعد ٹیم موقع پر پہنچی تھی۔
انہوں نے بتایا کہ خاتون کو اسپتال منتقل کیا گیا جہاں ان کی جان بچنے کیلیے ہنگامی اقدامات اٹھائے گئے لیکن وہ دورانِ علاج دم توڑ گئیں۔
ملزم کو اسی دن لندن کے علاقے کولنڈیل سے گرفتار کیا گیا تھا اور اس پر مقتولہ کے کے قتل اور جان لیوا ہتھیار رکھنے کا الزام عائد کیا گیا۔
ملزم کو عدالت میں پیش کیا گیا جہاں اسے پولیس کی تحویل میں دیا گیا۔ قتل کیس کی اگلی سماعت اگست میں ہوگی جہاں ملزم قصوروار یا بے قصور ہونے کی درخواست دائر کرے گا۔
