کراچی : بھارتی وزیراعظم مودی نے پیرس جاتے ہوئے پاکستان کی فضائی حدود کا استعمال کیا ، طیارے نے تقریباً 41 منٹ تک حدود میں سفرکیا۔

تفصیلات کے مطابق بھارتی وزیراعظم کی جانب سے پیرس جانے کیلئے پاکستانی فضائی حدود کا استعمال کیا گیا۔

ذرائع نے بتایا کہ مودی کا طیارہ’’انڈیاون‘‘لاہور کے قریب سےپاکستانی حدودمیں داخل ہوا اور شیخوپورہ، حافظ آباد، چکوال اور کوہاٹ کے اوپر سے سفر کیا۔

ذرائع کا کہنا تھا کہ مودی کے طیارے نے تقریباً 41 منٹ تک پاکستانی حدودمیں سفرکیا، افغان فضائی حدود بند ہے، اس لئے بھارتی وزیراعظم کو خصوصی اجازت دی جاتی ہے۔

یاد رہے گذشتہ سال امریکا سے بھارت واپسی کے دوران بھارتی وزیراعظم نریندر مودی نے پاکستانی فضائی حدود کا استعمال کیا تھا۔

بھارتی وزیر اعظم چھیالیس منٹ تک پاکستان کی فضائی حدود میں رہے، ان کا طیارہ شام پونے چھ بجے افغانستان سے چترال کے اوپر پاکستانی حدود میں داخل ہوا اور شام ساڑھے چھ بجے لاہور کے قریب سے بھارت کی فضائی حدود میں داخل ہوگیا تھا۔