ممبئی : بھارت میں خاتون نے ہیلمٹ نہ پہننے کے سوال پر ٹریفک پولیس اہلکار کی درگت بنا دی، سوشل میڈیا پر وائرل ہونے والی ویڈیو میں خاتون پولیس اہلکار کا گریبان پکڑے ہوئے اسے تھپڑ ماررہی ہے۔
تفصیلات کے مطابق بھارت کے شہر ممبئی میں ایک موٹر سائیکل سوار خاتون نے محض اس بات پر پولیس اہلکار کی پٹائی کردی کہ اس نے ہیلمنٹ نہ پہننے پر اسے روکا تھا۔
مذکورہ واقعے کی ویڈیو سوشل میڈیا پر وائرل ہوگئی جس میں دیکھا جاسکتا ہے کہ ایک خاتون ٹریفک پولیس اہلکار کی درگت بنارہی ہے، خاتون کے احترام میں اس اہلکار نے اُسے کچھ نہ کہا اور خاموشی سے پٹتا رہا۔
بھارتی میڈیا رپورٹس کے مطابق مذکورہ واقعہ ممبئی کے علاقے کاٹن ایکسچینج کے پاس پیش آیا جہاں ڈیوٹی پر موجود ٹریفک اہلکار نے موٹر سائیکل سوار خاتون کو روکا جس ہیلمٹ نہیں پہنا ہوا تھا۔
دونوں کے درمیان جرمانے کے اوپر پہلے تکرار شروع ہوئی اور پھر اس کے بعد اچانک خاتون نے سڑک پر پولیس اہلکار کو نہ صرف مارنا شروع کیا بلکہ اس کی وردی بھی پھاڑی دی۔
Assault on Mumbai police traffic police constable discharging his duty. Kalbadevi, Mumbai. pic.twitter.com/USe96NvG9Q
— Mustafa Shaikh (@mustafashk) October 24, 2020
خاتون نے دعویٰ کیا کہ پولیس اہلکار نے اُسے گالیاں دیں جس پر وہ غصہ ہوئی، جبکہ پولیس اہلکار نے خاتون کے دعوؤں کو مسترد کردیا۔
دوسری جانب مہاراشٹرا کی حکمراں جماعت شیو سینا کے رہنما سنجے راوت نے سماجی رابطے کی ویب سائٹ پر ایک پیغام جاری کیا جس میں انہوں نے مطالبہ کیا ہے کہ مذکورہ خاتون کے خلاف سخت ایکشن لیا جائے۔
انہوں نے اپنی پوسٹ میں مہاراشٹرا کے وزیر داخلہ کو بھی ٹیگ کیا اور کہا کہ یہ معاملہ پولیس کی عزت کا ہے۔
