نئی دہلی: بھارت میں کرونا وبا کی دوسری لہر کے دوران تباہی مچانے والی کرونا وائرس کی نئی قسم نے پھر شکل بدل لی ہے۔
تفصیلات کے مطابق بھارت میں کرونا وائرس کی سامنے آنے والی انتہائی متعدی قسم انڈین ویرینٹ یا ڈیلٹا ویرینٹ (B.1.617.2) نے ایک بار پھر شکل تبدیل کر لی ہے، ماہرین کا کہنا ہے کہ اس نئے ویرینٹ کو ڈیلٹا پلس یا AY.1 کا نام دیا گیا ہے۔
نہ صرف بھارت بلکہ پوری دنیا میں بھارتی کرونا وائرس نے دہشت پھیلائی تھی، تاہم اس نئے ویرینٹ کے بارے میں سائنس دانوں کا کہنا ہے کہ اس سے خوف زدہ ہونے کی ضرورت نہیں ہے۔
ماہرین کے مطابق کرونا وائرس اپنی شکل مستقل بدل رہا ہے، ڈیلٹا پلس دراصل کرونا کے ڈیلٹا ویرینٹ سے بنا ہے، جس سے رواں سال بہت زیادہ بیماری پھیلی تھی، اور جس نے بھارت سمیت کئی ممالک میں کہرام مچا دیا تھا۔
تاہم، سائنس دان اس نئے ویرینٹ کو لے کر زیادہ فکر مند نہیں ہیں، ان کا کہنا ہے کہ ابھی اسے لے کر کوئی فکر کی بات نہیں، کیوں کہ ملک میں ابھی اس کے بہت کم کیسز سامنے آئے ہیں۔
ماہرین کا کہنا ہے کہ ابھی اس کی جانچ کی جائے گی کہ یہ نیا ویرینٹ قوت مدافعت کو شکست دے کر ان لوگوں کے جسموں میں داخل ہو سکتا ہے یا نہیں جن کو ویکسین لگ چکی ہے۔
